Хвароба ад няякасных прадуктаў

…Мяса свойскага кабана ачысцілі ад спецый і солі, укруцілі ў матэрыю і павесілі сушыць над печкай. Праз некалькі дзён кумпяк знялі і пачаставаліся ўсёй сям’ёй. Старэйшая дачка занядужыла першай — адчула слабасць і сухасць у роце (першыя сімптомы батулізму). Праз некаторы час яе стан пагоршыўся – прадметы пачалі дваіцца перад вачамі, дыхаць станавілася ўсё цяжэй. Хворую забрала “хуткая”, і ўжо ў бальніцы ёй паставілі дыягназ “батулізм”. Вынік – рэанімацыя і барацьба за жыццё. Калі медыкі абследавалі ўсю сям’ю, высветлілася, што небяспечная хвароба зачапіла ўсіх…

Падобнымі гісторыямі “пястрыць” інтэрнэт. І колькі не тлумачаць медыкі пра цяжкія наступствы хваробы пад назвай батулізм, усё роўна людзі абыякава ставяцца да свайго здароўя, не выконваюць самыя простыя правілы прафілактыкі. Так, у Дзятлаўскім раёне сёлета з-за ўжывання ў ежу сапсаваных прадуктаў заразіліся два чалавекі.

Батулізм належыць да харчовых атручэнняў бактэрыяльнай прыроды, прычынай якога з’яўляецца не сама бактэрыя, а выпрацоўваемы ёю батулатаксін (нейратаксін) — адна з самых моцных біялагічных атрутаў. Як правіла, выпадкі захворвання ім становяцца больш частымі ўзімку і ранняй вясной. Абавязковай умовай для развіцця гэтых мікробаў з’яўляецца адсутнасць кіслароду, што можа адбывацца ў герметычна закручаных банках, у тоўшчы дрэнна вэнджаных кумпякоў, вяленай рыбы.

Для таго, каб засцерагчыся ад хваробы, варта пазбягаць, па магчымасці, кансервацыі прадуктаў у дамашніх умовах у слоіках з герметычнымі накрыўкамі, у якіх ствараюцца аптымальныя ўмовы для росту і размнажэння ўзбуджальніка. Лепш выкарыстоўваць адкрытыя метады нарыхтоўкі прадуктаў у запас, такія як сушка – для грыбоў і фруктаў, саленне і мачэнне – для агародніны і грыбоў.

У час кансервавання грыбы, плады і агародніну трэба старанна прамываць, уважліва сартаваць. Неабходна строга разлічваць дазіроўку солі, воцату і захоўваць час цеплавой апрацоўкі (пастэрызаваць не менш за 30-40 хвілін). Кансерваваныя прадукты трэба захоўваць пры тэмпературы не вышэй за 8°С.

Меры прафілактыкі батулізму пры вырабе мясных прадуктаў – гэта папярэджанне забруджання туш часцінкамі зямлі, гною ў працэсе іх разбірання. Каб папярэдзіць прарастанне спораў і ўтварэнне таксіну, саліць і захоўваць мясныя прадукты трэба ў холадзе. З мэтай прафілактыкі захворвання рэкамендуецца перад ядой падвяргаць мясныя прадукты дадатковай цеплавой апрацоўцы.

Каб пазбегнуць атручэння свежай рыбай, вылаўленую або размарожаную рыбу неабходна хутка выпатрашыць, прамыць у праточнай вадзе і пасля салення, вялення, вэнджання захоўваць у холадзе.

Не рэкамендуецца купляць кансерваваныя і прыгатаваныя ў дамашніх умовах прадукты на рынку і ў непрыстасаваных месцах. Варта помніць, што ўздуцце накрыўкі кансерваў сведчыць аб непрыгоднасці прадукту.

Л. ЛАЗОЎСКАЯ, 
загадчыца санітарна-эпідэміялагічнага аддзела Дзятлаўскага райЦГЭ