Гітарныя акорды

Аднойчы пачутыя гітарныя акорды запалілі і ў яго сэрцы жаданне навучыцца іграць на гэтым музычным інструменце.

Мара здзейснілася. Сёння Уладзіслаў Хіркоўскі з’яўляецца вучнем Дзятлаўскай дзіцячай школы мастацтваў, а таксама лаўрэатам трэцяй ступені абласнога конкурсу імя К. Горскага.

— Для мяне такі вынік на конкурсе быў неспадзяванасцю, — гаворыць Уладзіслаў.  І тут жа жартуе: — Я нават падумаў, што мяне разыгрываюць.

Ужо некалькі гадоў Уладзіслаў займаецца ў Андрэя Яўгенавіча Цыгеля. З’яўляецца ўдзельнікам школьнага квартэта гітарыстаў. А вось у  конкурсе абласнога ўзроўню ўдзельнічаў другі раз. Першай спробай стаў конкурс «Новыя імёны», дзе Уладзіслаў быў адзначаны граматай.

— Чаму ты абраў гітару, а не іншы інструмент? — цікаўлюся ва Уладзіслава.

— На мой погляд, гэта модны і стыльны музычны інструмент. Мужчынскі, — адказвае хлопец.

Акрамя музыкі, Уладзіслаў захапляецца яшчэ і мадэляваннем, наведвае адпаведны гурток, які працуе пры Цэнтры творчасці дзяцей і моладзі. У калекцыі хлопца — зробленыя  мадэлі танкаў  «Т-34», «Тыгр», «Іс-2», самалёт «Іл-2».

Уладзіслаў — вялікі аматар і камп’ютарных гульняў. Нават вядзе свой відэаблог, у якім дзеліцца вопытам, як прайсці той ці іншы ўзровень адпаведнай гульні. Падпісчыкаў у  відэаблога пакуль не так ужо шмат, кажа хлопец, аднак ёсць шмат сяброў у сацыяльнай сетцы «ВКонтакте».

У рэальнасці ва Уладзіслава таксама шмат сяброў. Спрыяе таму лёгкі і адкрыты характар, абаяльнасць, а таксама ўменне іграць на гітары: ва ўсе часы музычны талент прыцягваў да сябе ўвагу.
У планах Уладзіслава — навучыцца добра маляваць, а таксама паспрабаваць сябе ў новых творчых конкурсах — «Новыя імёны» і «ЛьВенок».

А. ДУБРОЎСКАЯ
Фота Н. АВЯРЧУК