З самага ранку 3 ліпеня на вуліцах Дзятлава ўжо шматлюдна. Арганізацыі, прадпрыемствы, рамеснікі рыхтуюць выставы сваіх дасягненняў, а дзятлаўчане і госці горада выходзяць на прагулку ў чаканні свята. Цікавімся, які настрой у гэты сонечны ясны дзень у гараджан і чаго яны чакаюць.
Таццяна Янушкевіч, метадыст Дзятлаўскага раённага цэнтра культуры і народнай творчасці:
– Работнікі культуры ў гэты святочны дзень і працуюць, і адпачываюць. З ранку пачынаецца звычайнае закуліснае жыццё, мы настройваемся на пазітыўны дзень і добразычлівых гледачоў. Сёння ў мяне цудоўны настрой, бо такое шчасце, што ў нас мірнае неба, мы спакойныя, упэўненыя ў заўтрашнім дні, мы ветліва сустракаем сваіх гасцей, і такія ж станоўчыя эмоцыі атрымліваем ад іх. Гэта самае лепшае свята, бо жывём у свабоднай краіне, можам спакойна прыходзіць сем’ямі, каб зарадзіцца цудоўным настроем. Сёння падрыхтавана вялікая праграма, будзе цікава і дарослым, і дзецям, таму шчыра запрашаем усіх на свята.
Таццяна Манчук, рамеснік:
– Сёння я ўдзельнічаю ў выставе-дэкаратыўна прыкладнога мастацтва, падрыхтавала дэкаратыўныя кампазіцыі з мыла, упрыгажэнні для валасоў, штучныя букеты, вырабы з гіпсу і шмат іншага. Настрой баявы і сонечны, як і надвор’е. Дзень Незалежнасці добрае свята, упэўнена, у гэты дзень кожны беларус ганарыцца сваёй краінай.
Работнікі Дварэцкага льнозавода:
– Мы з цудоўным настроем прыехалі на свята. Удзячныя нашым землякам за перамогу, што жывём пад мірным небам у такой цудоўнай краіне. Сёння падрыхтавалі выставу, на якой будзем прэзентаваць прадукцыю з ільну, а таксама прыгожыя вырабы ручной работы.
Андрэй Лях, намеснік дырэктара ТАА “Ізакам”:
– Настрой у нас сёння, як і надвор’е, гарачы. Рыхтуем для дзятлаўчан сюрпрыз, напэўна, такога ў нашым горадзе яшчэ не было. Думаю, многія здзівяцца, хочам падарыць людзям радасць, таму запрашаем усіх у госці. А ўвогуле Дзень Незалежнасці – гэта самавызначэнне нас як нацыі, і мы ганарымся, што мы – беларусы.
Сям’я Берасневіч:
– У нашай сям’і сёння выдатны настрой, плануем пабываць на многіх святочных мерапрыемствах у горадзе, нам усё цікава: і выставы-прэзентацыі, і канцэрт, і інтэрактыўныя пляцоўкі, а дачушка хоча пазабаўляцца на атракцыёнах. Цудоўна, што ў нашай мірнай краіне мы можам не толькі працаваць і клапаціцца пра матэрыяльнае, але і маем магчымасць весела і дружна адпачыць.
Святлана ГРЫШЫНА
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#нашелучшее #нашалепшае
