Дзе можна стаць танкістам?

Горда несці званне абаронцы Радзімы марыць амаль кожны юнак.

У нашай краіне навучыцца ваеннай справе можна ў многіх установах. Наколькі якасна забяспечваецца падрыхтоўка курсантаў, якія ўмовы створаны для навуковага працэсу і якія перспектывы адкрываюцца для хлопцаў, якія ўжо скончылі навучанне. Аб гэтым і не толькі расказаў курсант чацвёртага курса ваенна-тэхнічнага факультэта кафедры “Бранятанкавае ўзбраенне і тэхніка” Беларускага нацыянальнага тэхнічнага ўніверсітэта Ягор Маленчык.

— Ягор, калі ты вырашыў звязаць жыццё з ваеннай справай?

— Амаль усе хлопчыкі малодшых класаў мараць быць танкістамі, маракамі, лётчыкамі і касманаўтамі. Так і я з дзяцінства  марыў стаць танкістам, вадзіць велізарную машыну, насіць зброю, страляць, маршыраваць.

У старэйшых класах стаў задумвацца, куды пайсці вучыцца. Я звярнуўся з заявай у раённы ваенны камісарыят, затым прайшоў ва ўстаноўленыя тэрміны прафесійны адбор па стане здароўя, фізічнай падрыхтаванасці і прафесійна-псіхалагічным паказчыку. Закончыўшы 11 класаў, паспяхова здаў ЦТ па беларускай мове, матэматыцы і фізіцы і падаў дакументы на ваенна-тэхнічны факультэт Беларускага нацыянальнага тэхнічнага ўніверсітэта.

— Чаму вучаць на кафедры “Бранятанкавае ўзбраенне і тэхніка”?

— Навучанне тут вузкаспецыялізаванае. Я буду інжынерам-механікам па спецыяльнасці “Шматмэтавыя гусенічныя і колавыя машыны”.

Важнай умовай падрыхтоўкі высакакласных спецыялістаў з’яўляецца прыцягненне курсантаў да ваенна-навуковай работы. Усе выкладчыкі са шматгадовай вайсковай практыкай, прафесіяналы ў сваёй справе. Матэрыяльна-тэхнічная база кафедры вельмі добрая, якасна наладжаны навуковы працэс: тэорыя перамяжоўваецца з практыкай.

Мы ўжо праходзілі практыку ў Пячах па кіраванні баявымі машынамі і на рамонтным заводзе ў Барысаве.

— Якія ўмовы для пражывання?

— Яны жывуць у добраўпарадкаваным інтэрнаце па 3-4 чалавекі ў пакоі, забяспечваюцца неабходнымі рэчамі і трохразовым харчаваннем.

Створаны ўсе ўмовы для вучобы, адпачынку, быту, культурна-масавых і спартыўных мерапрыемстваў.

— Якія планы на будучыню?

— Добрага салдата характарызуе вытрымка і дысцыплінаванасць.

Паступаў я юнаком, а цяпер упэўнена магу сказаць, што за час вучобы я пасталеў, стаў самастойным і навучыўся цаніць час. У бліжэйшых планах – атрымаць як мага больш практычных ведаў. Мне засталося вучыцца паўтара года, далей будзе размеркаванне.

Вольга ЮШКЕВІЧ