З дабрачынным візітам наш раён чарговы раз наведалі валанцёры арганізацыі «Сябры Дзятлава» з Люксембурга. Арганізацыя супрацоўнічае з нашым рэгіёнам на працягу многіх гадоў, і кожны год прыязджае з новай дапамогай.
Дзятлаўскую цэнтральную раённую бальніцу валанцёры наведалі ў суправаджэнні нязменнага перакладчыка Людмілы Грыб, настаўніцы сярэдняй школы №3 горада Дзятлава, якая дапамагала гасцям і гаспадарам пераадольваць моўны бар’ер. З галоўным доктарам установы Марыя Максімовіч візіцёры павіталіся, як з даўняй знаёмай. Не дзіўна: «Сябры Дзятлава» шмат гадоў таму ўзялі гуманітарнае шэфства над райбальніцай. Летась, напрыклад, забяспечылі ўстанову аргтэхнікай: набылі 7 камп’ютараў. На гэты раз ад «Сяброў Дзятлава» Цэнтральная раённая бальніца атрымала новае медыцынскае абсталяванне для аддзялення хуткай дапамогі — дэфібрылятар і апарат тэлеЭКГ, які здольны не толькі рабіць кардыяграмы сэрца, але і перадаваць іх на адлегласці. Таксама валанцёры набылі памперсы для коек сястрынскага догляду, цацкі, памперсы і сродкі гігіены для дзіцячага аддзялення раённай бальніцы (для маленькіх пацыентаў, якія знаходзяцца тут з-за сацыяльнага недабрабыту).
Медыцынскае абсталяванне ўрачыста ўручылі старшаму фельчару хуткай дапамогі Ірыне Ішуцінай.
Карэспандэнтцы газеты расказалі, што бальніца — не адзіная ўстанова, якой традыцыйна аказваюць дапамогу «Сябры Дзятлава». Сёлета ў спісе атрымальнікаў яшчэ яслі-сад №1 горада Дзятлава, касцёл Унебаўзяцця Найсвяцейшай Панны Марыі і араторый. Таксама валанцёры набудуць харчовыя прадукты і лекі для сацыяльна неабароненых катэгорый грамадзян і сем’яў, якія трапілі ў складаную жыццёвую сітуацыю.
Нягледзячы на тое, што «Сябры Дзятлава» невялікая арганізацыя, яе ўдзельнікі стараюцца дапамагчы як мага большай колькасці людзей нашага рэгіёна, якія маюць у гэтым патрэбу. Валанцёры ўпэўнены, што медыцынскае абсталяванне, якое яны набылі для Дзятлаўскай цэнтральнай раённай бальніцы, будзе дапамагаць у дыягностыцы і лячэнні пацыентаў на працягу многіх гадоў.
І. КАЎКЕЛЬ
Фота П. АДАМЧУКА
Пытанне: мне патэлефанавалі і прапанавалі задэклараваць грашовыя сродкі. Мяркую, што гэта махляры. Як паводзіць сябе…
У Год беларускай жанчыны на старонках газеты “Перамога” расказваем пра нашых зямлячак, якія змагаліся на…
У раённым Цэнтры культуры і народнай творчасці прайшоў святочны канцэрт-шанаванне, прысвечаны надыходзячаму Дню медыцынскіх работнікаў.…
За невыкананне работ па падтрыманні належнага санітарнага стану на тэрыторыях зямель агульнага карыстання населеных пунктаў,…
Гэта высвятлялі выхаванцы летніка “Крута” гімназіі № 1 горада Дзятлава, наведаўшыся ў рэдакцыю раённай газеты…
Чым жыве летнік Выхаванцы летніка “Усмешка” сярэдняй школы № 1 горада Дзятлава імя А. М.…