Аб выкананні заданняў па зборы другасных матэрыяльных рэсурсаў у Гродзенскай вобласці

Праведзены Камітэтам дзяржаўнага кантролю Гродзенскай вобласці аналіз выканання Гродзенскай вобласцю даведзеных заданняў па зборы (нарыхтоўцы) другасных матэрыяльных рэсурсаў паказаў, што дапушчана адставанне ў выкананні заданняў па ўсіх відах другасных матэрыяльных рэсурсаў, а па асобных — выкананне задання пад пагрозай зрыву.

Так, за студзень-лістапад 2014 года ў вобласці сабрана 20,3 тысячы тон адходаў паперы і кардону, або 36% ад задання, 4,6 тысячы тон адходаў шкла (27% ад задання), 0,9 тысячы тон тэкстыльных адходаў (63% ад задання), 2,9 тысячы тон палімерных адходаў (81% ад задання), 3,8 тысячы тон зношаных шынаў (90% ад задання).

Пры гэтым невыкананне даведзеных паказчыкаў назіраецца ва ўсіх раёнах вобласці.

Камітэтам вобласці на адрас райвыканкамаў накіраваны прадпісанні аб прыняцці мераў па выпраўленні сітуацыі, якая склалася.

Акрамя таго, пры правядзенні кантрольна-аналітычных мерапрыемстваў Камітэтам вобласці выяўляюцца шматлікія парушэнні заканадаўства аб абыходжанні з адходамі.

За невыкананне ўстаноўленых заканадаўствам аб абыходжанні з адходамі абавязкаў па забеспячэнні збору, абясшкоджвання і (або) выкарыстання адходаў тавараў і тары да суб’ектаў гаспадарання прадугледжана адміністрацыйная адказнасць у адпаведнасці з часткай 1 артыкула 15.63 Кодэкса Рэспублікі Беларусь аб адміністрацыйных правапарушэннях, а за парушэнні іншых патрабаванняў заканадаўства аб абыходжанні з адходамі ў адпаведнасці з часткай 2 артыкула 15.63 Кодэкса аштрафаваны могуць быць як юрыдычныя, так і вінаватыя фізічныя асобы.

Пры гэтым за студзень-лістапад 2014 года Камітэтам вобласці за гэтае парушэнне да адміністрацыйнай адказнасці прыцягнуты 39 юрыдычных асобаў на агульную суму штрафу 324,8 млн. рублёў, 52 чалавекі — на суму 40,3 млн. рублёў.

У мэтах кантролю за выкананнем Указа Прэзідэнта Рэспублікі Беларусь ад 11.07.2012 №313, для скарачэння аб’ёмаў захавання адходаў спажывання і прадухілення шкоднага ўздзеяння гэтых адходаў на навакольнае асяроддзе, а таксама павышэння ўзроўню ўцягнення ў гаспадарчы абарот другасных матэрыяльных рэсурсаў Камітэт дзяржаўнага кантролю Гродзенскай вобласці нагадвае юрыдычным асобам і індывідуальным прадпрымальнікам, якія ажыццяўляюць вытворчасць і (або) увоз спажывецкіх тавараў, упакаваных у пластмасавую, шкляную тару, тару на аснове паперы і кардону, аб неабходнасці забяспечваць збор адходаў або заключыць з аператарам другасных матэрыяльных рэсурсаў дагавор і ўносіць плату за збор адходаў.

А. САДАЎНІЧЫ,
першы намеснік старшыні Камітэта дзяржкантролю Гродзенскай вобласці