19 мая на стадыёне “Колас” у Дзятлаве прайшоў матч 4-га тура занальнага этапа чэмпіянату Гродзенскай вобласці па футболе, у якім сустрэліся каманды ФСК “Дзятлава” і ФСК “Ашмяны”.
Пры падтрымцы родных трыбун нашы футбалісты ўпэўнена пачалі гульню, завяршыўшы першы тайм з лікам 4 : 0. Пасля перапынку ФСК “Дзятлава” павялічыла перавагу больш чым удвая, прапусціўшы ў свае вароты толькі адзін гол. Выніковы лік на табло – 9 : 1 на карысць дзятлаўчан.
Свой фірменны хет-трык паўтарыў Арцём Гузік, рэалізаваўшы тры пенальці, па два мячы на рахунку Уладзіслава Пазнякова і Аляксандра Сакуты, па адным – у Паўла Ляцягі і Максіма Дзмітрэвіча.
Трэнер каманды ФСК “Дзятлава” Уладзімір Ганчар расказаў пра ход чэмпіянату і састаў зборнай раёна:
– З кожным турам чэмпіянату наша каманда набірае ход, паказвае добрую гульню. Першая гульня была спробнай і не вельмі паспяховай: абкатваўся новы састаў, не ўсё атрымалася, як хацелася, і мы саступілі камандзе Лідскага раёна. Спадзяёмся, што ў другім крузе дома дадзім ім рэванш і забяром свае тры ачкі, якія аддалі напачатку. З другога боку, радуе, што сёлета ў камандзе з’явіліся новыя маладыя ігракі з ліку дзятлаўчан. Гэта Павел Герус, Расціслаў Гародка з Дзятлава, Яўген Вярстак з Казлоўшчыны. Яны ўжо цяпер паказваюць упэўненую гульню і падаюць вялікія надзеі. Той жа Павел і Яўген пачыналі на замене, а цяпер упэўнена замацаваліся ў асноўным саставе.
Пяты тур чэмпіянату Гродзенскай вобласці па футболе ФСК “Дзятлава” правядзе 26 мая ў гарпасёлку Карэлічы супраць гаспадароў поля.
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga