Тэмпы падрыхтоўкі сельгаспрадпрыемстваў да вясновых палявых работ, прычыны пажараў і траўмавання людзей, планы па добраўпарадкаванні і рамонце вуліц Дзятлава ў 2024 годзе і іншыя тэмы абмеркавалі на штотыднёвай нарадзе ў старшыні райвыканкама Андрэя Садоўскага.
Да сакавіка далёка, але і справаў шмат
У цэлым Андрэй Садоўскі адзначыў добры тэмп па падрыхтоўцы да вясновых палявых работ у раёне. Аднак пры дэталёвым разборы выявіліся тыя, хто “на чужым гарбе едзе ў рай”, таму без заўвагаў не абышлося. Напрыклад, па рамонце сельскагаспадарчай тэхнікі былі пытанні да гаспадарак “Дварэц-Агра” і “Жукоўшчына”. З падрыхтоўкай насеннай базы “не даглядзелі” КСУПы “Жукоўшчына” і “Хвінявічы”. Усе сельгаспрадпрыемствы даволі актыўна назапашваюць мінеральныя ўгнаенні, пытанні застаюцца толькі па “даборы” фосфару. Па рамонце тэхнікі важна зараз зрабіць акцэнт на глебаапрацоўчыя агрэгаты.
Кіраўнік раёна паставіў задачу ліквідаваць недахопы ў двухтыднёвы тэрмін, зазначыў недастатковы кантроль з боку спецыялістаў упраўлення сельскай гаспадаркі і харчавання райвыканкама.
– Першачарговае значэнне мае эканоміка сельскагаспадарчай галіны. Хутка абарона бізнес-планаў на 2024 год. Падыдзіце да гэтага этапу сур’ёзна і памятайце, што толькі ад эфектыўных укладанняў будзе аддача, – падрахункаваў старшыня райвыканкама.
“Нядрэмлючае вока” не дрэмле, а спіць
Пажары на Гродзеншчыне, як і снежны покрыў, “нарастаюць”. На мінулым тыдні адбыўся адзін пажар на Дзятлаўшчыне, абышлося без пацярпелых. У вобласці ж загінулі ў агні 5 чалавек. Асноўныя прычыны: непагашаная цыгарэта і парушэнні бяспекі пры эксплуатацыі ацяпляльнага абсталявання і печаў. Сёння раніцаю ў Шчучынскім раёне выяўлена абгарэлае цела вартаўніка ўстановы адукацыі.
– Мы сапраўды прывыклі надзяляць больш увагі ахове сельскагаспадарчых аб’ектаў і забываем, што вартавая ахова ёсць у большасці адміністрацыйных будынкаў. А тут спрацоўвае чалавечы фактар – “нядрэмлючае вока” зімовай марознай ноччу грэецца спіртным і засынае каля катла, які паліць. Праўду кажуць: усе інструкцыі па тэхніцы бяспекі напісаны крывёю, камусьці яны каштавалі здароўя або жыцця. Узмацніць кантроль за выкананнем патрабаванняў аховы працы, правесці пазапланавыя інструктажы па тэхніцы бяспекі ва ўсіх арганізацыях і на прадпрыемствах раёна, – падкрэсліў Андрэй Садоўскі.
Таксама з ініцыятывы пракурора Дзятлаўскага раёна Віталія Юрго на нарадзе была пастаўлена задача ўсім кіраўнікам правесці работы па ачыстцы дахаў адміністрацыйных будынкаў ад снегу, ледзяшоў і наледзяў. Абавязкова агароджваць праход для пешаходаў і праезд для транспартных сродкаў на час правядзення работ.
Хрышчэнскія традыцыі
19 студзеня ў Дзятлаве на верхнім возеры пройдзе свята Вадохрышча Гасподняга. Да ўдзелу ў ім запрашаюцца жыхары і госці райцэнтра. Традыцыйны малебен і асвячэнне вады правядзе благачынны Дзятлаўскай царкоўнай акругі іерэй Іаан Кісель. Усе жадаючыя, каб умацаваць свае духоўныя і фізічныя сілы, змогуць акунуцца ў палонку, якую, з драўлянымі падмосткамі для бяспекі, падрыхтуе Дзятлаўскае РУП ЖКГ. Ратаўнікі і прадстаўнік раённай арганізацыі АСВОД увесь час будуць побач, каб дапамагчы людзям бяспечна прайсці абрад акунання. Медыкі нагадваюць, што халодная вада – гэта сур’ёзная нагрузка на арганізм, будзьце асцярожныя, узважвайце ўсе за і супраць “марознай” традыцыі. Валанцёры раённай арганізацыі Таварыства Чырвонага Крыжа забяспечаць купальшчыкаў коўдрамі і пачастуюць удзельнікаў мерапрыемства гарачым чаем.
Ірына КАМАРОВА
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
