19 жніўня быў дадзены старт сумеснаму праекту раённага турыстычнага інфармацыйнага цэнтра і філіяла санаторый “Радон” ААТ “Белаграздраўніца”: адбылася першая экскурсія з сімвалічнай назвай “Знаёмцеся – Дзятлава!” для адпачывальнікаў санаторна-курортнай установы.
Па знакавых аб’ектах нашага горада яе правяла экскурсавод, спецыяліст па турызме ТІЦ Алена Абрамчык.
Надвор’е выдалася цёплым і сонечным, а таму 10 гасцей з задавальненнем пачулі шмат цікавага пра наш горад, пабывалі ў касцёле Унебаўзяцця Найсвяцейшай Панны Марыі, у гістарычным цэнтры горада на плошчы 17 Верасня, каля былой яўрэйскай сінагогі, помніка Іосіфу Філідовічу, камня на месцы нямецкага дзіцячага прытулка, палаца Радзівілаў, дзятлаўскага сабора Навамучанікаў і спаведнікаў Царквы Рускай, Праабражэнскага храма, каля помнікаў Героям Савецкага Саюза Яну Фогелю і Паўлу Пятрову, а таксама Ігнату Дварчаніну.
Алена Рыгораўна акцэнтавала увагу адпачывальнікаў на тым, што наш горад невялікі, аднак мае багатую і слаўную гісторыю, мы яго любім, ганарымся і гэту любоў імкнёмся перадаць гасцям і турыстам.
Удзельнікі экскурсіі з задавальненнем падзяліліся сваімі уражаннямі ад знаёмства з Дзятлавам.
Валянціна Кашапава, горад Масква:
– Вельмі спадабалася экскурсія. Вялікі дзякуй людзям, за адкрытасць і гасціннасць, за ўсё цікавае, што мы даведаліся пра Дзятлава і яго гісторыю. Алена Рыгораўна цудоўна правяла экскурсію, цёпла, з душой. Паўсюль, куды заходзілі, людзі сустракалі нас ветліва, радушна, са станоўчай энергетыкай. Напрыклад, я раней наогул не ведала пра Дзятлава, дзякуючы нераўнадушным людзям, з цікавасцю з ім пазнаёмілася.
Марыя Ананьева, горад Мінск:
– Я прыехала са сталіцы, і мне было вельмі цікава даведацца аб такім раённым цэнтры, як Дзятлава. Вельмі люблю падобныя экскурсіі, і гісторыя вашага горада кранула мяне да глыбіні душы. Дзятлава, як і многія беларускія гарады, шмат перажыло ў гады Вялікай Айчыннай вайны. Вельмі рада, што тут захоўваецца памяць пра людзей. Цікава было даведацца аб самым старажытным будынку – касцёле, аб будаўніцтве новага сабора і ўцэлым аб гісторы райцэнтра.
Мяркуецца, што падобныя мерапрыемствы будуць праходзіць рэгулярна і стануць яшчэ адной магчымасцю адчуць гасціннасць, прывабнасць і асаблівы, непаўторны каларыт Дзятлаўскага раёна, які з’яўляецца маляўнічым курортным куточкам Беларусі.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
