Лета сонейкам сагрэта
Выхаванцы аздараўленчага летніка “Карусель” Хвінявіцкай сярэдняй школы паглыбілі свае веды аб гісторыі, культуры, спартыўных дасягненнях, прыродзе, архітэктуры Рэспублікі Беларусь. Гэтаму паспрыялі розныя конкурсы, віктарыны, квэсты, вулічныя і спартыўныя гульні. Але, вядома, самым лепшым спосабам спазнаць свой край з’яўляецца экскурсія. На працягу змены выхаванцы летніка наведалі пляж у Дзятлаве, “Папяровае шоу” ў Доме культуры, Дзятлаўскі гісторыка-краязнаўчы музей.
А таксама пабывалі на займальнай экскурсіі ў горадзе Гродне. Першым пунктам падарожжа стаў Гродзенскі дзяржаўны музей гісторыі рэлігіі – адзіны музей у Рэспубліцы Беларусь, які спецыялізуецца на вывучэнні гістарычнага мінулага рэлігій і канфесій. Там дзеці пазнаёміліся з гісторыяй і культурай народаў, якія жывуць на тэрыторыі Беларусі. Далей адправіліся ў Гродзенскі заапарк, пабывалі ў тэрарыуме, акварыуме, на папугайні.
Кожны дзень з сюрпрызам
Супрацоўнікі Дзятлаўскага РАНС сустрэліся з выхаванцамі летнікаў “Сонейка” Жукоўшчынскай базавай школы , “Здаравячок” Казлоўшчынскай сярэдняй школы, “Весяльчак” Круцілавіцкай сярэдняй школы.У пачаткусустрэчы інспектар Мікіта Кандратовіч расказаў выхаванцам пра бяспеку ў побыце, як правільна абыходзіцца з электрапрыборамі, не дапусціць пажаранебяспечных сітуацый.
Але самым цікавым для дзяцей была дэманстрацыя пажарнай тэхнікі. Яны актыўна цікавіліся пра працу ратаўнікоў, агледзелі абсталяванне пажарнага аўтамабіля, патрымалі ў руках гідраўлічны аварыйна-выратавальны інструмент, надзелі дыхальны апарат на сціснутым паветры, які выкарыстоўваецца для абароны органаў дыхання і зроку падчас тушэння пажараў. Шчырае захапленне ў дзяцей выклікала дэманстрацыя работы аварыйнай сігналізацыі і пажарнага рукава.
У Ліду па ўражанні
Выхаванцы летніка “Сонейка” Жукоўшчынскай базавай школы пабывалі на экскурсіі ў горадзе Лідзе. Яны наведалі ААТ “Лидапищеконцентраты”, дзе пазнаёміліся з гісторыяй і тэхналогіяй вытворчасці выпускаемай прадукцыі; конную школу ў Дворышчах, атрымалі магчымасць не толькі палюбавацца на прыгожых насельнікаў, але і пракаціцца на іх; забаўляльна-гульнявы клуб “Палярыс”, там дзеці займальна правялі час, гуляючы ў лазертаг і праходзячы па вяровачным мосце.
Памяць пакаленняў
Выхаванцы профільнага палатачнага летніка “Патрыёт” Хвінявіцкай сярэдняй школы пабывалі на экскурсіі па маршруце: аграгарадок Хвінявічы – мемарыяльны комплекс “Музей. Зямлянка”, вёска Зачэпічы – магіла Іосіфа Філідовіча, вёска Шаршні – памятны знак Ліпічанскаму Сусаніну, вёска Чырвоны Бор – абеліск загінулым землякам, аграгарадок Хвінявічы. Вучні ўшанавалі памяць землякоў-герояў ускладаннем кветак і хвілінай маўчання. Валанцёрскую акцыю “Помнім. Ганарымся. Захоўваем”, якая прайшла падчас наведвання памятных месцаў малой радзімы, прысвяцілі Году міру і стварэння. Гадзінай памяці “Землякам, якія не вярнуліся з вайны” выказалі сваю ўдзячнасць за магчымасць жыць пад мірным небам.
Ніхто не забыты
У летніку “Весяльчак” Круцілавіцкай сярэдняй школы прайшоў Дзень памяці пад назвай “Ніхто не забыты, нішто не забыта”. Дзеці наведалі экспазіцыю школьнага музея “Дарогамі вайны”, даведаліся аб аднавяскоўцах, якія мужна абаранялі Радзіму ў гады Вялікай Айчыннай вайны, азнаёміліся з выставай “Генацыд: памятаць усіх, памятаць кожнага” ў Данілавіцкім доме культуры, усклалі кветкі ля помніка загінулым воінам у вёсцы Данілавічы, ушанавалі іх памяць хвілінай маўчання.
Падрыхтавала Таццяна САНЮК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga