Аб тым, што 22 лютага пройдзе Адзіны дзень дзіцячай бяспекі “Прапаганда выканання ПДР дзецьмі-пасажырамі”, дзяржаўтаінспекцыя праз СМІ паведаміла загадзя.
А вось паглядзець, як вадзіцелі непакояцца пра сваіх маленькіх пасажыраў, сёння, у дзень правядзення акцыі, інспектары міжраённага аддзела ДАІ выехалі сумесна з журналістамі раённай газеты.
Рэйд пачаўся на вуліцы Кастрычніцкай у Дзятлаве, за паўгадзіны спынілі больш за дзясятак аўтамабіляў, у некаторых – дзеці. Пасля праверкі дакументаў інспектары абследавалі бяспечнае размяшчэнне ў аўто непаўналетніх.
– Перавозка дзяцей да дванаццаці гадоў павінна ажыццяўляцца з выкарыстаннем дзіцячых утрымліваючых прыладаў, якія адпавядаюць вазе і росту дзіцяці, або бустара, спецыяльных падушак, дадатковых сядзенняў, якія дазваляюць бяспечна прышпіліць дзіця з дапамогай рамянёў бяспекі, – нагадваў вадзіцелям і ўручаў памяткі інспектар Андрэй Іскра. – Можна перавозіць дзяцей і без выкарыстання дадзеных прыстасаванняў у выпадку, калі рост дзіцяці вышэйшы за 150 сантыметраў.
Да рэйдавай групы наблізілася машына таксі.
– Усё, што зараз тлумачыў папярэдняму вадзіцелю, датычыцца і перавозкі дзяцей у таксі, – дадаў Андрэй Анатольевіч.
Нягледзячы на тое, што дадзенае патруляванне праходзіла ў пазітыўным ключы, супрацоўнікі ДАІ ўсё ж папярэдзілі, што за невыкарыстанне дзіцячага ўтрымліваючага прыстасавання ў выпадках, калі яно абавязкова павінна быць, вадзіцелі транспартных сродкаў могуць быць прыцягнуты да адміністрацыйнай адказнасці ў выглядзе папярэджання або штрафу ў памеры да 4 базавых велічыняў, у выпадку паўторнага парушэння на працягу года – ад 2 да 8 базавых велічыняў.
Дарослыя, памятайце, што ў пытаннях бяспекі дробязяў не бывае, а памылкі абыходзяцца потым занадта дорага. Не забывайце, што самы каштоўны груз у аўтамабілі – гэта якраз вашы маленькія пасажыры, а іх здароўе і жыццё – ваш галоўны прыярытэт.
****
У прафілактычны дзень супрацоўнікі ДАІ адправіліся і ва ўстановы адукацыі горада, каб у чарговы раз нагадаць навучэнцам і дашкольнікам аб выкананні правілаў дарожнага руху.
Ірына КАМАРОВА
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
