У нядзелю, 18 снежня, у Дзятлава прыбыў Віфлеемскі агонь – скаўцкую эстафету перадалі ў касцёле Унебаўзяцця Найсвяцейшай Панны Марыі.
Запаліць агонь у галоўны храм горада прыйшлі прыхаджане і госці райцэнтра. Полымя сімвалізуе нараджэнне Збавіцеля, а таксама спакой, надзею і адзінства. Агонь запальваецца ў базіліцы Раства Хрыстова ў Віфлееме, а потым дастаўляецца ў Вену (Аўстрыя) і перадаецца ў розныя краіны Еўропы і Паўночнай Амерыкі. Напярэдадні свята Божага Нараджэння святло запаленай свечкі набывае вялікі сакральны сэнс – менавіта з ім, што асвятліла грэшнае жыццё чалавека, асацыіруюць вернікі прышэсце на зямлю Хрыста.
Ксёндз-пробашч Здзіслаў Пікула заклікаў прыхаджан бліжэйшыя пяць дзён захоўваць пост, прыходзіць да споведзі ў храм, разам памаліцца за матуляў, якія чакаюць нараджэння дзетак, за дзяцей і моладзь, студэнтаў і адступленне пандэміі. Ён запрасіў усіх на святочную імшу, прысвечаную Нараджэнню Хрыстоваму, і Калядны канцэрт, якія адбудуцца 25 снежня ў Дзятлаве.
У гэты дзень кожны з прыхаджан змог патрымаць у руках святыню, атрымаць праз яе Божае благаславенне.
Віфлеемскі агонь з касцёла Унебаўзяцця Найсвяцейшай Панны Марыі ў Дзятлаве адправіцца ў іншыя каталіцкія храмы раёна.
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
