У рамках рэспубліканскай акцыі “Вандруй. Адчуй. Натхняйся” наведвальнікі аддзялення дзённага знаходжання для грамадзян пажылога ўзросту Цэнтра сацыяльнага абслугоўвання насельніцтва Дзятлаўскага раёна разам з загадчыцай Галінай Касцюк пабывалі з агляднай экскурсіяй у санаторыі “Альфа Радон”.
Гасцям паказалі камфортныя і ўтульныя нумары для пражывання адпачывальнікаў, канферэнц-залу, басейн, кабінеты, дзе аказваюць розныя лячэбна-аздараўленчыя паслугі, дзіцячы пакой. Таксама турысцкай групе падрабязна расказалі аб санаторыі, яго напаўняльнасці, акцэнтавалі ўвагу на міжнародным статусе папулярнай дзятлаўскай здраўніцы, бо на тэрыторыі “Альфа Радона”, у чым госці самі пераканаліся, можна сустрэць не толькі айчынных, але і замежных наведвальнікаў.
– Цікавая ў іх завядзёнка: як толькі заходзіш у корпус санаторыя, адразу можна зразумець, адкуль прыехалі турысты, бо на рэсепшэне разам з беларускімі стаяць маленькія сцяжкі і іншых дзяржаў, з якіх прыбылі замежнікі. Былі і расіяне, і літоўцы, і латышы, і немцы. Уразілі сістэма “разумны дом” у нумарах, гразевыя пакоі, букросінг на лесвічных пралётах, рукадзельныя лебедзі ў спальнях для маладых. Ад гарачага надвор’я нас ратавалі фітачаем, вадой з лімонам і мятай, частавалі яблыкамі, – расказала Галіна Касцюк.
Вадзім ФІЛІПОЎСКІ
Фота ўдзельнікаў экскурсіі
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
