Чым жыве “Весяльчак”?

Выхаванцы летніка “Весяльчак”, які працуе на базе Круцілавіцкага дзіцячага сада-сярэдняй школы, у дзень падарожжаў адправіліся на экскурсію ў Ліду.

Яны наведалі Цэнтр бяспекі МНС, дзе кваліфікаваныя спецыялісты ў інтэрактыўнай форме паведамілі выхаванцам асноўныя правілы бяспекі жыццядзейнасці. Дзеці мелі магчымасць віртуальна апынуцца ў надзвычайных сітуацыях і паглыбіць свае ўменні і навыкі бяспечных паводзін у розных жыццёвых абставінах. Так, выхаванцы выклікалі экстранныя службы па тэлефоне, тушылі пажар, паўтаралі правілы дарожнага руху, паглыбілі веды аб бяспечных паводзінах ля вадаёмаў улетку. Напрыканцы віртуальнага падарожжа ўсіх удзельнікаў чакаў праверачны тэст. Прыемна парадавала тое, што выхаванцы адказалі на пытанні і мелі магчымасць атрымаць дадатковыя прызы.

Таксама яны наведалі Лідскі замак. Дзеці даведаліся аб асаблівасцях жыцця беларускіх князёў ХІV стагоддзя, аб гісторыі пабудовы і існавання замка, змаглі ўбачыць замкавую плошчу, рыцарскія пакоі, вежы, старажытныя прадметы побыту.

Днём пазней у летніку прайшоў тэматычны дзень МНС “На варце бяспекі”, у час якога выхаванцы атрадаў “Усмешка” і “Адрэналін” сустрэліся з супрацоўнікамі Дзятлаўскага МНС. Яны пазнаёмілі дзяцей з абсталяваннем і камплектацыяй пажарнай машыны, паказалі і растлумачылі, як выкарыстоўваюцца ў рабоце ратаўніка спецыяльныя прадметы, дазволілі прымерыць касцюмы. Дзеці паспрабавалі самі кінуць выратавальны круг тапельцу, назіралі, як працуе пажарная машына, нават прабегліся пад струменьчыкамі вады.