У Дзятлаўскім раённым камітэце прафсаюза работнікаў аграпрамысловага комплексу ёсць добрая традыцыя: ушаноўваць сваіх ветэранаў працы і прафсаюзнага руху.
Нядаўна за шматгадовую добрасумленную працу раённы прафсаюзны лідар Валерый Макарчык і старшыня райкама прафсаюза работнікаў АПК Уладзімір Казак уручылі былому галоўнаму бухгалтару арганізацыі Ганне Бельскай заслужаную ўзнагароду – Грамату Дзятлаўскага раённага аб’яднання прафсаюзаў.
Нарадзілася Ганна Мікалаеўна на Дзятлаўшчыне ў вёсцы Труханавічы. Скончыла Лідскае культасветвучылішча, а таксама завочна Ашмянскі сельскагаспадарчы тэхнікум па спецыяльнасці “бухгалтар”. На працягу 36 гадоў працавала ў райкаме прафсаюза работнікаў АПК. Работы было шмат. У савецкія гады на балансе раённага камітэта знаходзіліся тры піянерскія лагеры. Іх забеспячэнне, улік і размеркаванне пуцёвак, іншыя фінансавыя пытанні – усім гэтым разам са сваімі калегамі займалася Ганна Бельская.
Ужо больш за 20 гадоў Ганна Мікалаеўна на заслужаным адпачынку. У свае 83 гады вядзе актыўны лад жыцця, шмат чытае і займаецца хатнімі клопатамі.
Вадзім ФІЛІПОЎСКІ
Фота ўдзельнікаў узнагароджання
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
