Звыш 60 маладых дрэўцаў высаджана ў Дзятлаве.
Азеляніць шматнаселеныя мікрараёны і зрабіць агульную справу, якая прынясе карысць роднаму гораду, выйшлі работнікі РУП ЖКГ, інспекцыі прыродных рэсурсаў і аховы навакольнага асяроддзя, лідары і актывісты ГА “БРСМ”, дэпутаты моладзевага парламента пры раённым Савеце дэпутатаў.
У Год народнага адзінства пасадка дрэваў стала адным з сімвалаў яднання. Экалагічныя акцыі збіраюць аднадумцаў, якія імкнуцца рабіць дабро на карысць нашай краіны і нагадваюць усім, што прырода ў нас адна.
На гэты раз пасадка дрэваў стартавала на вуліцы Навагрудскай, была прадоўжана каля Будкомплекса, ТАА “Ізакам”, па вуліцах Прытыцкага і Фрунзэ, завяршылася ў мікрараёне шматпавярховай забудовы па вуліцах Перамогі, Клары Цэткін, Чырвонаармейскай райцэнтра, дзе нядаўна адбыўся капітальны рамонт дваровай тэрыторыі.
– Папярэдне мы прайшліся па горадзе, ацанілі стан дрэваў, якія тут ужо растуць, падлічылі, колькі яшчэ неабходна высадзіць, – патлумачыла кветкавод Дзятлаўскага РУП ЖКГ Алена Іодчык.
– Для азелянення райцэнтра было падрыхтавана каля 90 маладых саджанцаў прыгожых ліставых пародаў – ліпы, клёна, дуба, – расказаў намеснік дырэктара РУП ЖКГ Віктар Дзедуль. – Больш за 50 з іх мяркуецца высадзіць у мікрараёнах вуліц Навагрудская, Прытыцкага, Фрунзэ, астатнія – на дваровай тэрыторыі мікрараёна вуліцы Перамогі. Мы рады, што азеляняць райцэнтр нам дапамагае моладзь, хочацца спадзявацца, што і астатнія дзятлаўчане будуць шанаваць тое, што зроблена рукамі землякоў і іх саміх. Месячнік па добраўпарадкаванні прадаўжаецца, і мы запрашаем жыхароў мікрараёна вуліц Перамогі, Клары Цэткін, Чырвонаармейскай выйсці і аказаць дапамогу ў пасадцы дрэваў у замен тых, якія па неабходнасці былі выдалены пры складанні праектна-каштарыснай дакументацыі. Тэлефон для кантактаў 6-68-36.
Першы сакратар раённага камітэта ГА “БРСМ” Кацярына Хілімончык зазначыла, што для моладзевага аб’яднання падобныя мерапрыемствы сталі традыцыйнымі, яны прадоўжаны і ў Год народнага адзінства. Сёлетняй вясной маладыя дзятлаўчане ўжо паўдзельнічалі ў экалагічным моладзевым праекце “Сад сямейных дрэваў”: высадзілі клёны на набярэжнай па вуліцы Фогеля. Восенню моладзь таксама вырашыла далучыцца да азелянення роднага горада.
– Навядзенне парадку – важная справа, адметна, калі ў ёй прымае ўдзел маладое пакаленне, якое заадно вучыцца берагчы і шанаваць сваю зямлю, – выказала меркаванне каардынатар дзейнасці моладзевага парламента Ірына Мішчанка. – Наш моладзевы парламент разам з дэпутатамі раёна гэтай вясной пасадзіў алею лістоўніц каля абеліска Славы ў Дзятлаве, а цяпер мы дапамагаем камунальнікам азеляняць іншыя мікрараёны.
Сваімі ўражаннямі ад удзелу ў мерапрыемстве падзяліліся і юныя актывісты.
Анастасія Маскаль, навучэнка сярэдняй школы № 3 горада Дзятлава, дэпутат моладзевага парламента:
– Настрой цудоўны, бо працуем з сябрамі на свежым паветры, робім горад, у якім нарадзіліся і выраслі, яшчэ больш зялёным і прыгожым. Прыемна будзе думаць, што недзе расце тваё дрэва. Я люблю Дзятлава, асабліва прываблівае гарадскі парк, дзе можна прагуляцца і адпачыць у любы сезон.
Анастасія Нічыпаровіч, навучэнка сярэдняй школы № 1 горада Дзятлава:
– Гэта цікавы працоўны вопыт. Я тут з чатырма аднакласнікамі, час за карыснай справай пралятае непрыкметна. Спадзяюся, наша работа дасць плён: праз год-два дрэвы падрастуць, на іх фоне можна будзе рабіць прыгожыя фотаздымкі. Я люблю зялёныя насаджэнні, бо імі заўсёды прыемна палюбавацца.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
