У Гродзенскім аблвыканкаме ўшаноўвалі лепшых жанчын вобласці.
Сярод узнагароджаных жанчын, якія ўнеслі значны ўклад у развіццё Гродзенскай вобласці, адзначана галоўны бухгалтар КСУП “Войневічы” Дзятлаўскага раёна Таццяна Пятліцкая.
З 1985 года працуе Таццяна Станіславаўна ў сельскай гаспадарцы. Акрамя абласной узнагароды, за шматгадовую добрасумленную працу ў галіне сельскай гаспадаркі, дасягненне высокіх вытворчых паказчыкаў Таццяна Пятліцкая ўзнагароджана граматамі Дзятлаўскага райвыканкама, Дзятлаўскага райкама прафсаюза работнікаў аграпрамысловага комплексу. Таццяна Станіславаўна выконвае і самае важнае прызначэнне жанчыны – яна маці траіх дзяцей.
Ад кіраўніцтва аблвыканкама ўсім удзельніцам урачыстага прыёму былі ўручаны кветкі і падарункі, таксама гучалі пажаданні моцнага здароўя, кахання, шчасця і дабрабыту ў сем’ях.
Таццяна Пятліцкая падзялілася ўражаннямі ад мерапрыемства ў Гродне:
– Я вельмі ўдзячна за тое, што кіраўніцтва нашага раёна і вобласці цэніць сваіх работнікаў, што працу нашу заўважаюць, аддаюць ёй даніну павагі. Дзякую арганізатарам мерапрыемства за цеплыню прыёму, за шчырыя словы віншаванняў і падзяк. Я чалавек вельмі сціплы, таму ў час уручэння ўзнагароды адчувала, як моцна б’ецца сэрца.
Пра сябе магу сказаць, што я вельмі шчаслівая жанчына, у мяне трое дзяцей, шасцёра ўнукаў. Хачу адзначыць, што для жанчыны, каб рэалізавацца як спецыяліст на працы, вялікая сям’я зусім не перашкода. Тым больш, што праца, якой я займаюся, мне па душы.
Стварыць камфортныя ўмовы для работы – галоўная задача, якую стаўлю перад сабой і сваім калектывам.
Магу сказаць, што я той чалавек, які з радасцю ідзе на працу і з радасцю вяртаецца вечарам дадому.
Аксана АНДАЛЮКЕВІЧ