Абрад «Юр’я» на Дзятлаўшчыне

Удзельнікі народнага фальклорнага гурта вёскі Ахонава з нецярпеннем чакалі свята Юр’я, рыхтуючыся да яго традыцыйнага правядзення. 5 мая адвячоркам жанчыны прыгожыя, у нацыянальных строях, пачалі збірацца каля хаты адной з удзельніц. Затым гурт накіраваўся да крыжа, які стаіць у пачатку вёскі каля царквы. Падышоўшы да яго, перахрысціліся і са словамі прашэння звярнуліся да святога Юр’я, каб ён узяў ключы і адамкнуў зямліцу ад зімовага сну, выпусціў цёплую расіцу на палеткі, папрасілі ў меру сонца, дожджыка, каб зямелька радзіла, каб добра вялася скацінка і быў мір і дабрабыт у людзей. Далей загучала абрадавая песня «Да мы Юр’я сустрачаем». Але скажыце, што няма на свеце цуда: як толькі загучала песня — ласкава засвяціла сонейка, гучней заспявалі птушкі. Песня паняслася па ўсёй акрузе, і гурт рушыў па вёсцы з абрадавымі песнямі: «Вялік святы наш дзень настаў», «Ой, хадзіла пава па балоце», «Каля каменя», «У мураванай мураванцы» і іншыя, да гурта далучыліся і мясцовыя жыхары. Сёлета да абрада прыпала 2 паясы. Гурт падышоўшы да дома, дзе жыве маладая пара, якая жанілася летась, з песняй «Маладая малодачка». Маладыя кідалі на гурт шлюбны пояс, які, як лічаць мясцовыя жыхары, мае магічную сілу, аберагае ад сурокаў. Пояс раздзяляўся паміж усімі прысутнымі абрадавай дзеі.