Дзяржаўтаінспекцыя праводзіць на дарогах вобласці аперацыю “Прышпіліся!”. Доўжыцца яна будзе да 24 снежня.
Дзяржаўтаінспектары ставяць сваёй мэтай не толькі выявіць і пакараць вадзіцеляў і пасажыраў, якія забываюцца прышпільвацца ў дарозе і не выкарыстоўваюць дзіцячыя крэслы, але і данесці да ўсіх удзельнікаў руху наступствы ад ігнаравання гэтых асноўных і элементарных правілаў дарожнага руху.
Існуе памылковая думка, што, маўляў, прышпіляцца трэба толькі тады, калі выязджаеш за горад, пераадольваеш вялікія адлегласці. Але і ў горадзе нават у нязначным дарожна-транспартным здарэнні можна атрымаць цяжкія цялесныя пашкоджанні. Напрыклад, пры ўдары збоку ў выпадку заносу аўтамабіля, пры перакульванні, аварыях на скрыжаваннях. Акрамя ўсяго, асцярожнасць за рулём неабходна праяўляць у выхадныя дні, калі колькасць аўтамашын на дарогах павялічваецца ў некалькі разоў.
Асаблівую заклапочанасць выклікаюць дзеці-пасажыры. Дарослыя не заўсёды ставяцца з адказнасцю да іх перавозкі ў аўтамабілі: не прышпільваюць рамянямі бяспекі, садзяць спераду да 12-гадовага ўзросту, не выкарыстоўваюць дзіцячае крэсла.
Варта нагадаць, што за кіраванне транспартным сродкам вадзіцелем, не прышпіленым рамянём бяспекі, або перавозку пасажыраў, не прышпіленых рамянямі бяспекі, прадугледжана адміністрацыйная адказнасць у выглядзе штрафу ў памеры да 23 рублёў. У выпадку паўторнага на працягу года ўчынення дадзенага парушэння правілаў дарожнага руху штраф складзе ад 46 да 115 рублёў.
Аляксандр КАЛІНІН,
старшы дзяржаўтаінспектар міжраённага аддзела ДАІ
