Слізістая стрававода не прыстасавана да надта гарачай ежы. Пашкоджанне эпітэлію можа прывесці нават да анкалогіі.
Небяспека заключаецца ў тым, што ў выніку апёку гарачай ежай або вадкасцю фарміруецца рубец, што зніжае праходнасць стрававода. Гэта пагражае недаяданнем, сепсісам, пнеўманіяй, трахеабранхітам, ларынгітам. Пры апёку чацвёртай ступені трахеабранхіяльнага дрэва і стрававода можна загінуць. Асабліва небяспечна даваць гарачую ежу дзецям, у якіх нават невялікія апёкі слізістых стрававода, глоткі, гартані або ротавай поласці здольны прывесці да парушэння дыхання і звужэння гартані, што небяспечна для жыцця.
Паводле даследаванняў вучоных, ужыванне моцна гарачых напояў (тэмпературай каля 70 градусаў) і ў вялікай колькасці (звыш 1 л у дзень) можа выклікаць рак стрававода.
Памятайце, тэмпература вадкасці не павінна перавышаць 60 градусаў. Піце дробнымі глыткамі і павольна. Вазьміце на ўзбраенне народны метад вызначэння аптымальнай для сябе тэмпературы. Калі можаце трымаць у руках кубак з чаем, значыць, і напой ужываць можна.
А. ГІРЫК,
доктар-тэрапеўт Дзятлаўскай ЦРБ