Барацьбу з авітамінозам трэба весці адразу ў двух накірунках: правільнае харчаванне і здаровы лад жыцця.
Пераходзім на вясновы рэжым харчавання. Штодня ўжывайце ў ежу адзін жаўток, апельсін або грэйпфрут, па адной шклянцы малака або кефіру, 50 г тварагу і 30 г смятаны, а таксама хлеб з мукі грубага памолу. Не менш за два разы у тыдзень ужывайце ў ежу чырвонае мяса і стравы з печані, а ў астатнія дні аддавайце перавагу рыбе. Актыўна ўключайце ў рацыён зялёную цыбулю, лісце салаты, шпінат, лук-парэй, кроп і пятрушку. Макароны і смажаную бульбу замяніце лёгкімі агародніннымі гарнірамі. Адмоўцеся ад багатых чаяванняў з булачкамі і тартамі. Прымайце вітамінна-мінеральныя комплексы, папярэдне абавязкова параіўшыся з доктарам!
Жыццё – у руху! Гэты пункт барацьбы з авітамінозам змяшчае зусім няхітрыя правілы, паспрабуйце выконваць іх і вельмі хутка адчуеце сябе бадзёрымі. Прачнуўшыся раніцай, пацягніцеся ўсім целам і зрабіце некалькі простых фізічных практыкаванняў. На працу ці з працы ідзіце пешшу мерным крокам, робячы глыбокія ўдыхі. У выхадныя абавязкова знаходзьце час для прагулак або заняткаў спортам на свежым паветры.
А. ШАЙБАК,
галоўны доктар Дзятлаўскага райЦГЭ