Што мы разумеем пад словамі «Прыгажосць» і «Рамантыка»?

Нядаўна на сцяне шматкватэрнага дома па вуліцы К. Цэткін з’явіўся надпіс «Я ♥ Таню! Олю!».

Графіці належыць невядомаму «мастаку», які нават не задумваўся, што не вельмі даўно дом быў адрамантаваны. Не задумваўся закаханы і аб тым, што яго паводзіны, згодна з законам, расцэньваюцца, як псаванне маёмасці і цягнуць адміністрацыйнае пакаранне.

На жаль, многія графіцісты кампенсуюць адсутнасць майстэрства і мастацкага густу дзёрзкасцю. Таму іх «работы» і не цягнуць больш, чым на артыкул адміністрацыйнага кодэкса. Сказаць па-праўдзе, калі б я была на месцы Вольгі або Тані, якім адрасуецца надпіс (вядома, калі гэтыя дзяўчыны наогул існуюць у прыродзе, а не з’яўляюцца вынікам фантазіі «крутога» аўтара), то мне было б вельмі сорамна перад суседзямі за такога «кавалера». Маладыя людзі, не псуйце сцены, дарыце дзяўчатам кветкі. На крайні выпадак, зрабіць надпіс можна на свежым снезе або крэйдай на асфальце. Няхай ён захаваецца не надоўга, затое кожны раз можна напісаць штосьці новае і рамантычнае. А надпісы фарбамі на сценах адрамантаваных жылых дамоў — гэта не рамантыка і нават не каханне, гэта — праблемы выхавання. А навошта дзяўчатам нявыхаваныя хуліганы? Я б такіх «мастакоў» за кіламетр абыходзіла. Я люблю свой горад, і мне балюча, калі яго спрабуюць ператварыць у сметнік. А вы што думаеце на гэты конт, паважаныя жыхары Дзятлава?

ВЫПАДКОВАЯ ПРАХОЖАЯ