У Гродне прайшоў семінар для журналістаў па праграме «Здароўе народа і дэмаграфічная бяспека Рэспублікі Беларусь».
Кіраўнік праекта «Падтрымка рэалізацыі Нацыянальнай праграмы дэмаграфічнай бяспекі Рэспублікі Беларусь» (ён рэалізуецца пры падтрымцы Фонду ААН па падтрымцы народанасельніцтва, урада Расійскай Федэрацыі і фонду ААН «ЮНІСЕФ») Марыяна Сакалова адзначыла: «Дэмаграфія як тэма патрабуе ўдумлівых адказных адносінаў з боку сродкаў масавай інфармацыі. З нашага пункту гледжання неабходна фарміраванне кола журналістаў-экспертаў у гэтай вобласці, і наш семінар стане чарговым крокам у гэтым кірунку».
Асноўныя палажэнні праграмы «Здароўе народа і дэмаграфічная бяспека Рэспублікі Беларусь», якая была прынята вясной бягучага года агучыла Марына Арцеменка, намеснік начальніка аддзела народанасельніцтва, гендэрнай і сямейнай палітыкі Міністэрства працы і сацыяльнай абароны Рэспублікі Беларусь.
Акцэнт у ёй зроблены на развіццё і ўмацаванне сямейных каштоўнасцяў, павышэнне іх прэстыжу, павелічэння ўзроўню працягласці жыцця.
Удзел у семінары прыняў начальнік упраўлення аховы здароўя Гродзенскага аблвыканкама Андрэй Стрыжак. У сваім выступленні ён закрануў тэму, якая датычыцца аховы мацярынства і дзяцінства.
У час семінару былі ўзняты пытанні, якія датычацца ролі журналістаў у прапагандзе здаровага ладу жыцця, сямейных каштоўнасцяў. Была агучана думка аб неабходнасці больш звяртаць увагу на асвятленне тэмаў здаровага ладу жыцця, ахову сямейных каштоўнасцяў.
А. ДУБРОЎСКАЯ