Эстафету вясковых святаў пасля Дварца пераняў аграгарадок Вензавец. 19 чэрвеня тут праходзіла свята касцоў.
У спаборніцтвах на лепшага касца ўдзельнічалі шэсць малойцаў – Ілья Андура (СВК “Русь-Агра”), Станіслаў Сёмуха (“Граніт-Агра”), Віктар Хінько (“Слава працы”), Мікалай Лянцэвіч (“Вензавец”), Леанід Бурбліс (“Белагурна”). Кожны з іх меў яшчэ і каманду падтрымкі для далейшых спаборніцтваў, якія ўключалі зграбанне травы і складванне ў стажок. Таксама трэба было напаіць хлопца вадой, сплесці сёмухаўскі вянок, прыпомніць, з якой песні словы.
Самым удалым касцом прызнаны Мікалай Лянцэвіч, мясцовы вензавецкі касец. А вось у камандным заліку вензавецкія хлопцы і дзяўчаты саступілі: занялі трэцяе месца.
Першае месца журы, улічыўшы хуткасць, якасць, майстэрства ўдзельнікаў, прысудзіла камандзе “Граніт- Агра”. За яе выступалі Віталь Бакей, Вераніка Аблажэй, Станіслаў Сёмуха, Анастасія Аблажэй, Аляксандр Валчэцкі. Каманда адзначана дыпломам, прэміяй і караваем ад гаспадароў свята.
Другое месца прысуджана СВК “Белагурна”. Каманда таксама прымала ўзнагароды і віншаванні.
У час свята быў паказаны абрад благаславення на касьбу. Майстар-клас па кляпанні касы правёў жыхар Вензаўца Уладзімір Іосіфавіч Пуйша. Мясцовая Вензавецкая школа зладзіла выставу прыладаў працы і побыту аднавяскоўцаў.
Працавалі падворкі, гандлёвыя кропкі. Сувеніры і бяспройгрышную латарэю прапаноўвалі гісторыка-краязнаўчы музей і народныя ўмельцы. Дзятлаўскі лясгас частаваў і прапаноўваў мёд, у яго можна было набыць венікі для лазні і мётлы.
Музычную праграму прапанавалі суседзі – сямейныя ансамбль Жукоў з Лідскага раёна, а таксама дзятлаўскія артысты.
Святу спрыяла надвор’е і камфортнае месца.
І. МІХАЙЛОЎСКАЯ
Фота Б. ВАРНЫ