1 кастрычніка ў актавай зале сярэдняй школы №1 г. Дзятлава на традыцыйную сустрэчу, прымеркаваную да Дня пажылых людзей і Дня настаўніка, сабраліся ветэраны педагагічнай працы — залаты фонд Дзятлаўшчыны. Дзякуючы іх паўсядзённай самаадданай працы тысячы нашых землякоў атрымалі пуцёўкі ў дарослае жыццё, сталі годнымі людзьмі і цяпер ужо самі працуюць на карысць краіны.
Першым да педагогаў-ветэранаў звярнуўся старшыня Дзятлаўскай раённай арганізацыі Беларускага прафсаюза работнікаў адукацыі і навукі С. Б. Фабішэўскі. Станіслаў Баляслававіч расказаў, чым сёння жыве прафсаюзная арганізацыя раёна, над якімі праектамі працуе, якія праблемы вырашае, якім чынам адстойвае інтарэсы сваіх членаў. Старшыня райкама прафсаюза павіншаваў прысутных са святам, пажадаў здароўя, актыўнага даўгалецця, любові і клопату блізкіх.
Кажуць, што ў кожнага педагога ёсць вучні, якімі ён ганарыцца. Што гэта шчырая праўда, удзельнікі сустрэчы ўпэўніліся ў час выступлення намесніка старшыні Дзятлаўскага раённага выканаўчага камітэта М. В. Мацюкевіча, які прыйшоў павіншаваць педагогаў-пенсіянераў.
— Прыемна прыходзіць на такія сустрэчы, бо тут прысутнічаюць і мае настаўнікі (я скончыў сярэднюю школу №1 горада Дзятлава), — зазначыў Мікалай Валер’евіч, — прыемна бачыць, як мяняецца, аднаўляецца школа. Прафесія настаўніка важная і высакародная, бо педагогі нясуць святло ведаў, аддаюць часцінку душы сваім вучням. Са святам вас, паважаныя, шчасця, здароўя, доўгіх гадоў жыцця.
М. В. Мацюкевіч уручыў Падзячныя пісьмы старшыні Дзятлаўскага раённага выканаўчага камітэта педагогам-пенсіянерам — З. Я. Стэльмах, А. М. Чурыла.
Эстафету віншаванняў і пажаданяў перанялі начальнік аддзела адукацыі, спорту і турызму райвыканкама І. С. Кухарэвіч і сакратар Дзятлаўскай раённай арганізацыі Беларускага грамадскага аб’яднання ветэранаў Я. М. Гушча. Яны ўручылі граматы заслужаным і актыўным настаўнікам-пенсіянерам. Граматы раённага камітэта арганізацыі Беларускага прафсаюза работнікаў адукацыі і навукі ветэранам педагагічнай працы ўручыў С. Б. Фабішэўскі.
Святочны настрой прысутным сваімі песнямі стваралі работнікі cектара пазастацыянарнага абслугоўвання насельніцтва ДУК «Дзятлаўскі раённы цэнтр культуры і народнай творчасці» — Ганна Панько, Васіль Шпігановіч, Ірына Бакшук Музычныя падарункі для ветэранаў педагагічнай працы таксама падрыхтавалі навучэнцы сярэдняй школы №1 горада Дзятлава.
Сёлетнія 60, 70, 80-гадовыя юбіляры прынялі ўдзел у бліц-апытанні аб гадах работы ў школе, атрымалі падарункі ад спонсараў і музычныя віншаванні ад дзяцей і работнікаў культуры. Былыя калегі віншавалі адзін аднаго вершамі, узгадвалі маладосць, сяброў, блізкіх. Свае вершы чыталі Г. М. Шундрык, Л. У. Лакіза.
Цёплая сустрэча мудрых людзей завяршылася сяброўскімі пажаданнямі. Кожны з прысутных развітваўся да наступных сустрэчаў.
І. КАЎКЕЛЬ
Фота П. АДАМЧУКА