Мерапрыемства з парадкам дня “Аб рабоце Наваельнянскага пасялковага выканаўчага камітэта і пасялковага Савета дэпутатаў па забеспячэнні развіцця сацыяльнай сферы, добраўпарадкаванні гарадскога пасёлка Наваельня” адбылося ў Наваельнянскім пассавеце 30 сакавіка.
У ім удзельнічалі кіраўнікі райвыканкама, старшыні сельскіх і пасялковых выканкамаў, кіраўнікі шэрагу раённых арганізацый і службаў, ідэалагічныя работнікі СВК
З сацыяльна-эканамічным становішчам Наваельнянскага пасялковага савета ўдзельнікаў мерапрыемства пазнаёміла яго старшыня І. Кунахавец.
На тэрыторыі гарпасёлка Наваельня, які займае плошчу ў 5,24 квадратных кіламетра і налічвае 34 вуліцы, 6 завулкаў, знаходзяцца 1294 падворкі, жывуць 3187 чалавек. У складзе насельніцтва гарпасёлка 1915 працаздольных, 814 пенсіянераў, 462 дзіцяці, 4 ветэраны вайны, 24 шматдзетныя сям’і, 39 адзінокіх грамадзян, 427 чалавек жывуць адзінока. За 2014 – 2015 гады ў Наваельні нарадзіліся 39 дзяцей.
Самыя буйныя прамысловыя прадпрыемствы на тэрыторыі гарпасёлка – камбінат хлебапрадуктаў, міжрайагразабеспячэнне, участак па ізаляцыі трубаў. Прадпрыемствы мацуюць сваю матэрыяльна-тэхнічную базу, праводзяць мадэрнізацыю вытворчасці.
На тэрыторыі пасёлка налічваецца 36 гандлёвых аб’ектаў. Нядаўна абноўлены магазін “Тавары для дома”.
У Наваельні працуюць дзве ўстановы адукацыі. Навучальна-выхаваўчай работай з 324 вучнямі сярэдняй школы займаюцца 38 педагагічных работнікаў. Для вучняў 1 – 11 класаў арганізаваны 58 факультатыўных заняткаў. Штогод вучні праходзяць аздараўленне ў дзіцячых рэабілітацыйна-аздараўленчых цэнтрах “Лясная паляна” і “Ждановічы”. У 2014 годзе атрымалі аздараўленне 280 вучняў (86,7 працэнта). Яшчэ 30 чалавек наведалі лагеры, 8 – пабылі за мяжою. Агульная колькасць дзяцей, якія прайшлі аздараўленне, склала 323 чалавекі (97,8 працэнта).
У дзяржаўнай установе адукацыі “Наваельнянскі яслі-сад” шэсць узроставых груп наведваюць 87 дзяцей. Праз рашэнне райвыканкама была створана інтэграваная група для дзяцей з цяжкімі парушэннямі маўлення. Заўважна выніковасць аздараўленчай работы санаторных груп, на працягу года групы наведвалі 24 дзіцяці – усе, хто мелі ў гэтым патрэбу.
Медыцынскім абслугоўваннем мясцовых жыхароў займаецца Наваельнянская гарадская бальніца на 20 тэрапеўтычных ложкаў. Пры бальніцы маецца гарадская паліклініка, якая працуе ў дзве змены і разлічана на 100 наведванняў за змену. У штаце бальніцы 51 чалавек: 3 дактары, 25 сярэдніх медработнікаў, 15 малодшых медработнікаў, 8 работнікаў гаспадарчай службы. Платныя паслугі ў бальніцы аказваюць стаматалагічная і фізіятэрапеўтычная службы. Пратэзаваннем зубоў займаюцца спецыялісты цэнтральнай раённай бальніцы.
Летась і сёлета Гродзенскім РУП “Фармацыя” зроблены ўнутраны рамонт наваельнянскай аптэкі на суму 469,6 мільёна рублёў.
На тэрыторыі пасёлка знаходзяцца тры ўстановы культуры: дзіцячая школа мастацтваў, гарадскі Дом культуры, пасялковая бібліятэка. Дом культуры і бібліятэка – цэнтры зносін і інфармацыі, якія рэгулярна арганізуюць разнастайныя культурна-масавыя мерапрыемствы для рознаўзроставых катэгорый удзельнікаў.
Пры гарадскім Доме культуры працуюць 12 клубных фарміраванняў: 10 гурткоў мастацкай самадзейнасці, 2 аматарскія аб’яднанні – іх наведваюць 148 чалавек. Дзейнічаюць 7 дзіцячых клубных фарміраванняў, у якіх займаецца 71 чалавек. Набыта новая музычная апаратура і мэбля.
Бібліятэка цяпер размешчана ў нядаўна адрамантаваным будынку.
Наваельнянскі дом быту аказвае наступныя паслугі: рамонт вопраткі, пракат, хімчыстка, рамонт абутку, вязка трыкатажу, рамонт трыкатажу, рытуальныя паслугі, мыццё бялізны, цырульныя паслугі, пашыў вопраткі, перапрацоўка сельгаспрадукцыі, фатаграфія, рамонт складанай бытавой тэхнікі, рамонт тэле- і радыёапаратуры, догляд тэрыторыі (выкошванне травы), мыццё і чыстка дывановых пакрыццяў, выраб жалезабетонных канструкцый (агароджы).
Вялікі выбар асноўных і дадатковых паслугаў прапануе мясцовая АТС. Чаргі на ўстаноўку тэлефона няма, усе заяўкі задаволены ў вызначаны тэрмін. Кожны абанент АТС мае магчымасць падключэння высокаскораснага доступу ў Інтэрнэт пад гандлёвай маркай Byfly. Папулярнасцю карыстаецца інтэрактыўнае тэлебачанне.
Штат аддзялення паштовай сувязі “Наваельня” складаюць 7 чалавек. Паштальёны аддзялення абслугоўваюць 4 даставачныя ўчасткі. Частата дастаўкі пошты – адзін раз у дзень, 5 разоў на тыдзень. Летась адрамантаваны дах будынка паштовага аддзялення.
За апошнія гады ў Наваельні асфальтаваны 7 вуліц, 6 пешаходных дарожак, 9 вуліц газіфікаваны. У 2014 годзе была вырашана праблема капітальнага рамонту дома №45 па вуліцы Чырвонаармейскай – на рамонт даху і месцаў агульнага карыстання выдаткаваны 1 мільярд 35 мільёнаў рублёў. Адрамантаваны 800 квадратных метраў дахаў шматпавярховых дамоў. Пабудавана царкоўная нядзельная школа. На чыгуначнай станцыі ўведзены ў эксплуатацыю бытавы корпус з майстэрнямі і трыма гаражнымі боксамі. Зроблена падсыпка вуліцы Талкуноўскай і завулка ад яе, вуліцы і завулка Фурсенкі, завулка Дварэцкага, вуліц Лясной і Зялёнай, выкананы ямкавы рамонт вуліц Чырвонаармейскай, Карла Маркса, Першамайскай, Леніна. Заменена цеплатраса па вуліцах Школьная і Лясная. Рэканструявана цеплатраса для падключэння магазінаў “Пралеска”, “Тавары для дома”, “Раніца”. Абсталяваны пляцоўкі ў дварах па вуліцы Снітко, 6 і 7. Абсталяваны чатыры кантэйнерныя пляцоўкі на могілках. Электрыфікавана вуліца Шашэйная. Заменены лаўкі на стадыёне.
Заключаюцца дагаворы на вываз бытавога смецця. Смецце з сектара прыватнай забудовы вывозіцца па чацвяргах і пятніцах штотыдзень, ад шматпавярховых дамоў па панядзелках, серадах і пятніцах.
На тэрыторыі пасёлка знаходзяцца адны могілкі і два пахаванні загінулых у час Вялікай Айчыннай вайны. Догляд пахаванняў даручаны пасялковым арганізацыям.
Пры пасялковым выканаўчым камітэце дзейнічаюць грамадскія фарміраванні: 6 вулічных камітэтаў, камісія для садзеяння кантролю за выкананнем заканадаўчых актаў аб свабодзе веравызнання і рэлігійных арганізацыях, камісія па забеспячэнні пажарнай бяспекі, савет жанчын, грамадскі пункт аховы правапарадку. Грамадскія фарміраванні праводзяць планавыя пасяджэнні адзін раз у квартал і пазапланава пры ўзнікненні патрэбы.
Штогод ладзіцца свята гарпасёлка з конкурсам на лепшы падворак, кветнік, з выставай майстроў народнай творчасці. Самыя актыўныя ўдзельнікі вулічных камітэтаў у час свята атрымліваюць падзякі і падарункі.
Пасялковы выканкам рэгулярна аказвае матэрыяльную дапамогу малазабяспечаным жыхарам Наваельні: дапамагае адрамантаваць печы, замяніць электраправодку, набыць і ўстанавіць аўтаномныя пажарныя апавяшчальнікі. Да прыкладу, летась дапамаглі набыць паліва 98 чалавекам, сёлета ў жыллі трох адзінокіх жыхароў замянілі электраправодку.
Ёсць у пасёлку і праблемы: трэба лепш упарадкаваць некаторыя падворкі, замяніць састарэлыя агароджы, выканаць культуртэхнічныя работы каля тэрыторый арганізацый і прадпрыемстваў, прадоўжыць асфальтаванне вуліц. Выканкам пассавета спадзяецца справіцца з гэтымі праблемамі пры актыўным удзеле жыхароў Наваельні і садзеянні кіраўнікоў мясцовых прадпрыемстваў і арганізацый, якім дзякуе за ўжо зробленае.
Удзельнікі мерапрыемства наведалі мясцовую сярэднюю школу, азнаёміліся з яе знакамітым музеем, пабылі ў нядзельнай школе пры храме Ражства Прасвятой Багародзіцы, у гарадской бібліятэцы, кафэ “Сосны”, у экспартна-сартавальнай базе.
Старшыня раённага Савета дэпутатаў А. Бараноўскі азнаёміў удзельнікаў Дня пассавета з вынікамі аб’езду-маніторынгу сельскіх саветаў раёна, што быў зроблены напярэдадні, у суботу і нядзелю.
У Дзятлаўскім сельсавеце кінулася ў вочы неўпарадкаванасць гаспадарчага двара мясцовага СВК “Русь-Агра” ў Раклевічах, не ачышчаныя сянажныя ямы, закінутая ферма.
Выказаны заўвагі па санітарным стане аграгарадка Вензавец.
У Казлоўшчынскім сельсавеце шмат закінутых прысядзібных участкаў.
У Войневічах новая забудова аграгарадка выглядае добра, а старая частка вёскі вымагае догляду.
У Мяляхавіцкім сельсавеце ёсць некалькі закінутых участкаў пры самым уездзе на тэрыторыю раёна.
Аляксандр Станіслававіч ухваліў догляд аграгарадка Дварэц: чыста.
Шмат працаваць на доглядзе тэрыторыі давядзецца ў Данілавіцкім сельсавеце.
У здавальняючым стане вуліцы аграгарадка Гезгалы, але тэрыторыя ля кацельні, за гаражамі яшчэ не прыбрана.
Новая забудова ў аграгарадку Жукоўшчына выглядае добра, а ў старой Жукоўшчыне не пачаты край работы. Тут жа і стыхійныя звалкі смецця знайшліся.
Вынікі Дня Наваельнянскага пассавета падвёў старшыня райвыканкама І. Крахмальчык. Ён засяродзіў увагу прысутных кіраўнікоў на абнаўленні і аздабленні дахаў, фасадаў, двароў прадпрыемстваў і ўстановаў да маючых адбыцца ў Дзятлаўскім раёне абласных “Дажынак”. У прыклад паставіў добраўпарадкаванне суседняга Слоніма. Старшыня райвыканкама падзякаваў за выкананую работу па добраўпарадкаванні Наваельні старшыні пасвыканкама І. Кунахавец, наказаў не спыняцца на дасягнутым.
Б. ВАРНА
