У СГФ “АграМілк” на палетку, што побач з горадам Дзятлавам, ідзе зяблевая апрацоўка глебы пад пасеў будучага года.
У работах задзейнічаны сучасны шматфункцыянальны культыватар-глыбокарыхліцель, першы такі ў раёне.
Культыватар КГП з шырынёй захопу 6,2 метра – універсальны агрэгат, прызначаны для глыбокай безадвальнай апрацоўкі глебы, якая адбываецца разам з задзелкай саломы і лушчэннем іржышча.
У сучаснага прычапнога абсталявання нямала перавагаў: культыватар аптымальна размяркоўвае салому ў глебе, добра раўняе глыбокія каляіны, пакінутыя сельскагаспадарчай тэхнікай у час жніва, стварае ўшчыльненне для аптымальнага прарастання падаліцы. Паклапаціліся вытворцы і пра камфорт аграрыяў: глыбіню апрацоўкі глебы можна рэгуляваць, не выходзячы з кабіны трактара.
– Культыватар-глыбокарыхліцель – добрае набыццё для гаспадаркі, паколькі, дзякуючы сваёй шматфункцыянальнасці, дазваляе апрацоўваць глебу адначасова і на паверхні, і на глыбіні да 30 сантыментраў, – тлумачыць галоўны аграном СГФ “АграМілк” Андрэй Лежань. – Абсталяванне выкарыстоўваецца на землях, дзе ўбіралі кукурузу на зерне, для заворвання раслінных рэшткаў. Пасля такой апрацоўкі поле будзе аптымальна падрыхтавана да вясновага севу.
Механізатары таксама задаволены новай беларускай тэхнікай і абсталяваннем, якія не саступаюць па вытворчых якасцях замежным аналагам.
Асвойвае агрэгат механізатар Іван Абухаў, які мае амаль 20 гадоў стажу, 10 з іх – на Дзятлаўшчыне, вопыт у розных відах сельскагаспадарчых работ – ад ворыва да пасеву. Ён пачынаў працаваць на МТЗ-80, далёка не такім зручным, як сучасны.
– Вядзём работы пераважна на беларускай тэхніцы, якая за пару дзесяцігоддзяў зрабіла вялікі крок наперад, – расказвае мужчына. – Напрыклад, у трактары МТЗ-3522, на якім я цяпер працую, ёсць зручная сістэма кіравання, кандыцыянер і нават “аўтапілот” – сістэма навігацыі абсталявання. Адным словам, маем усе магчымасці для стабільнай, камфортнай работы ў полі, было б толькі жаданне.
Наталля АВЯРЧУК
Фота Вольгі ЮШКЕВІЧ
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
