У трэцюю нядзелю чэрвеня сваё свята адзначаюць прадстаўнікі самай міласэрнай і чалавечнай прафесіі – медыкі.
Аб рабоце дзеля здароўя людзей, важных дасягненнях і штодзённых клопатах, прафілактыцы каранавірусу і новых кадрах у Дзятлаўскай ЦРБ расказаў галоўны доктар установы Алег Анцух.
– Алег Іванавіч, узгадайце знакавыя падзеі, якія адбыліся ў медыцыне раёна за мінулы год.
– На працягу года былі праведзены рамонтныя работы: адноўлены будынкі Казлоўшчынскай гарадской бальніцы, адрамантаваны Вензавецкі ФАП, кабінеты ў Дварэцкай амбулаторыі, зубапратэзнае аддзяленне райпаліклінікі, пасля планавага рамонту адкрыліся абноўленыя тэрапеўтычныя аддзяленні райбальніцы. Усё гэта робіцца для камфорту пацыентаў і медыцынскіх работнікаў. Акрамя таго, мы паступова абнаўляем медыцынскае абсталяванне, аўтамабільны парк установы. З’явіліся новыя маніторы ў рэанімацыйным аддзяленні, новы апарат ультрагукавой дыягностыкі. Заўважу, што сёння ў нас працуюць чатыры спецыялісты гэтага профілю, праводзяцца ўсе віды ультрагукавой дыягностыкі. У бліжэйшых планах – мадэрнізацыя сістэмы падачы кіслароду.
Аднай падзеяй мінулага года можна лічыць з’яўленне “свайго” камп’ютарнага тамографа. Апарат размяшчаецца на базе Навагрудскай райбальніцы, аднак дзятлаўчане могуць прайсці на ім даследаванне ў кароткія тэрміны, дадзеныя якога перадаюцца на Дзятлаўскую райбальніцу, расшыфроўку робіць наш доктар-рэнтгенолаг Вольга Юч. Гэта першы ў Гродзенскай вобласці вопыт дыстанцыйнага чытання вынікаў камп’ютарнай тамаграфіі.
– Раскажыце падрабязней пра сённяшняе пакаленне медыкаў Дзятлаўшчыны.
– Дзятлаўская раённая бальніца – гэта сінтэз вопыту і маладосці. У нас працуюць выдатныя прафесіяналы з вялікім стажам работы. Нездарма другі год запар нашы дактары адзначаюцца нагрудным знакам “Выдатнік аховы здароўя Рэспублікі Беларусь”. Сёлета яго атрымаў хірург Іван Родзькін. У райбальніцы моцныя традыцыі пераемнасці пакаленняў, настаўніцтва, куратарства, што дапамагае эфектыўнай рабоце калектыву. У гэтым годзе зноў чакаем прыезд 6 дактароў і 18 медыцынскіх работнікаў сярэдняга звяна. Медыцынскія сёстры і памочнікі доктара-тэрапеўта будуць працаваць пераважна ў амбулаторна-паліклінічнай службе, многія з іх адправяцца ў сельскія падраздзяленні. Раскрыю сакрэт: спецыялісты якога профілю з’явяцца ў раённай паліклініцы: гэта неўролаг, акушэр-гінеколаг, доктар агульнай практыкі, тэрапеўт, рэнтгенолаг, афтальмолаг. Станоўчым вопытам стала ўвядзенне ў штат бальніцы ставак загадчыка аддзялення хуткай дапамогі і загадчыка клініка-дыягнастычнай лабараторыі, на якіх працуюць маладыя амбіцыёзныя дактары. Для моладзі ствараюцца спрыяльныя ўмовы, у тым ліку жыллёвыя: пры падтрымцы райвыканкама ў мінулым годзе нашым спецыялістам было выдзелена шэсць арэндных кватэраў.
– Як справы ў раёне з каранавіруснай інфекцыяй?
– На дадзены момант фіксуюцца адзінкавыя выпадкі захворвання на COVID-19, часцей за ўсё яны выяўляюцца ў час шпіталізацыі пацыентаў у бальніцу. Усе структурныя падраздзяленні Дзятлаўскай ЦРБ адкрыты для аказання планавай дапамогі, зняты абмежаванні, звязаныя з каранавіруснай інфекцыяй. Свой плён для нармалізацыі сітуацыі дала масавая вакцынацыя насельніцтва: дзвюма дозамі вакцыны былі прышчэплены 70 % жыхароў раёна, у тым ліку 20 % дзяцей ва ўзросце ад 12 да 17 гадоў. З мінулага года пачалася рэвакцынацыя насельніцтва. Людзі разумеюць, што расслабляцца ў сітуацыі з кавідам не варта, таму ўжо сёння актыўна запісваюцца на прышчэпку.
– Чаго пажадаеце калегам па працы?
– Як гэта ні банальна гучыць, моцнага здароўя. Медыцынскім работнікам гэта важна не менш, чым іх пацыентам. Удачы ва ўсіх справах, цярпення калегам і іх блізкім. Дзякую ўсім за працу!
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
