Каталікі Дзятлава сустрэлі парафіяльнае свята

15 жніўня ў касцёле Унебаўзяцця Найсвяцейшай Панны Марыі ў Дзятлаве адзначылі парафіяльнае свята.

Госці ўрачыстасці прайшлі калонай у суправаджэнні новаяльнянскага аркестра да касцёла на чале з прадстаўнікамі гаспадарак нашага раёна, якія трымалі ў руках снапы новага ўраджаю.

Свята наведаў першы намеснік старшыні Дзятлаўскага райвыканкама, начальнік упраўлення сельскай гаспадаркі Віталій Шулейка.

Дапаможнага біскупа Гродзенскай дыяцэзіі Юзафа Занеўскага, які прыехаў на Дзятлаўшчыну для ўдзелу ва ўрачыстасці, прывіталі хлебам-соллю, кветкамі і салодкім падарункам. Хор “Ветэраны ў страі” сустрэў гасцей свята песняй “Багародзіца”.

На пачатку святочнай імшы ксёндз-пробашч Здзіслаў Пікула павітаў усіх прысутных, падзякаваў сваім прыхаджанам за актыўнасць і іх шчырыя сэрцы.

Ксяндзу Здзіславу дзеці падзякавалі за яго адкрытае сэрца, непагасную любоў да прыхаджан, добрыя вочы і цёплую ўсмешку, за Божае слова, якое пасеяў у сэрцах. Пажадалі моцнага здароўя, сілаў, радасці.

Ды парафіян звярнуўся біскуп Юзаф Занеўскі, заклікаўшы разам памаліцца і падзякаваць Пану Богу за новы ўраджай:

– Яшчэ нядаўна былі зажынкі, калі на хлебных палетках каталіцкія і праваслаўныя святары асвячалі сельскагаспадарчую тэхніку і благаслаўлялі работнікаў гаспадарак на плённую працу са словам Божым. А ўжо сёння мы ўсе прыйшлі падзякаваць Пану Богу за добры ўраджай, за хлеб на нашым стале і за наша жыццё, поўнае радасці.

Святары і вернікі ўзнеслі малітвы, выказалі падзяку Хрысту і Маці Божай.

Запаленая свечка, крыж, букет кветак, сноп з сёлетняга ўраджаю, хлеб, малітоўнік, ружанец – усё гэта стала дарамі, якія вернікі касцёла прынеслі для Ісуса Хрыста і Яго Найсвяцейшай Маці ў знак удзячнасці.

Кранальную песню падарыў прысутным з нагоды свята Сяргей Малышчык.

Напрыканцы службы вернікі касцёла асвяцілі кветкі, садавіну і агародніну. Прадстаўнікі сельскагаспадарчых прадпрыемстваў раёна асвяцілі снапы з каласоў новага ўраджаю. Завяршылася свята хрэсным ходам вакол касцёла.