8 мая адзначаецца Міжнародны дзень Чырвонага Крыжа, бо менавіта ў гэты дзень у 1828 годзе нарадзіўся яго заснавальнік – швейцарскі пісьменнік і журналіст Анры Дзюнан.
Сёлета на Дзятлаўшчыне да гэтай падзеі прымеркавана віншавальная акцыя “Дзень нараджэння з Чырвоным Крыжам”. У час яе падарункі ад раённага аб’яднання атрымалі дзятлаўчане, якія, як Анры Дзюнан, з’явіліся на свет 8 мая.
Першай старшыня Дзятлаўскай раённай арганізацыі Таварыства Чырвонага Крыжа Галіна Касцюк павіншавала чатырохгадовую жыхарку Наваельні Дар’ю Уліту. З дзяўчынкай сустрэліся ў Новаяльнянскім дзіцячым садзе, таму пажаданні для яе прагучалі і ад педагогаў установы – членаў пярвічкі аб’яднання. Галіна Эдвардаўна падарыла Дашы прыгожую ляльку, сродкі гігіены, яркія дзіцячыя дапаможнікі ад Чырвонага Крыжа.
Яшчэ адзін падарунак быў накіраваны ў Казлоўшчынскі псіханеўралагічны дом-інтэрнат для састарэлых і інвалідаў, дзе жыве Аляксандр Трафімчук, які таксама адсвяткаваў свой дзень нараджэння 8 мая.
Трэцяй віншаванні ад Галіны Касцюк і валанцёраў раённай арганізацыі Чырвонага Крыжа прымала 80-гадовая юбілярка з Дзятлава Ядвіга Кашко. Для яе 8 мая гучалі самыя цёплыя і шчырыя словы пажаданняў.
Месячнік Чырвонага Крыжа толькі пачаўся, і прыемных сюрпрызаў ад раённай арганізацыі яшчэ будзе шмат.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
