На чарговым пасяджэнні Дзятлаўскага раённага выканаўчага камітэта былі заслуханы справаздачы аб рабоце сельскагаспадарчых арганізацый раёна па павышэнні ўзроўню эфектыўнасці вытворчасці малака на малочнатаварных фермах, якія прайшлі мадэрнізацыю матэрыяльна-тэхнічнай базы; як выконваюцца патрабаванні Дэкрэта Прэзідэнта Рэспублікі Беларусь ад 15 снежня 2014 года №5 “Аб узмацненні патрабаванняў да кіруючых кадраў і работнікаў арганізацый”; аб стане захаванасці маёмасці і рабоце суб’ектаў прафілактыкі па папярэджанні крадзяжоў на тэрыторыі Дзятлаўскага раёна.
У пасяджэнні прынялі ўдзел намеснік старшыні Камітэта дзяржаўнага кантролю Гродзенскай вобласці Аляксандр Садаўнічы, начальнік галоўнага ўпраўлення арганізацыйна-кадравай работы Гродзенскага аблвыканкама Валерый Клімовіч, намеснік старшыні Камітэта па сельскай гаспадарцы і харчаванні Гродзенскага аблвыканкама Ігар Сарокін.
На пачатку работы старшыня Дзятлаўскага райвыканкама Аляксандр Дубовік адзначыў, што ў апошнія гады дзяржава ўклала вялікія сродкі ў будаўніцтва малочнатаварных фермаў і комплексаў, прыняты шэраг праграмаў, якія датычацца малочнай галіны. Так, у Дзятлаўскім раёне пабудаваны 4 новыя фермы, 7 – рэканструяваны, аднак назіраецца зніжэнне вытворчасці і рэалізацыі малака, ёсць праблемы з яго якасцю.
— Пытанне вынесена на разгляд выканкама з мэтай разабрацца ва ўсіх праблемах, якія існуюць сёння, і вызначыць адпраўную кропку да паляпшэння сітуацыі, — падкрэсліў кіраўнік раёна.
У сваёй аналітычнай справаздачы намеснік начальніка ўпраўлення сельскай гаспадаркі і харчавання райвыканкама Васіль Гранкоўскі праінфармаваў, што на працягу апошніх трох гадоў дапушчана зніжэнне аб’ёмаў вытворчасці малака на новых і мадэрнізаваных малочнатаварных фермах.
За пяць месяцаў 2017 года па раёне выраблена 20160 тон малака, што складае 99,2% да ўзроўню мінулага года. Зніжэнне вытворчасці малака дапусцілі КСУПы “Русь-Агра”, “Вензавец”, “Дварэц-Агра”, “Жукоўшчына” і “Белагурна”. Прадуктыўнасць дойнага статка па ферме «Вензавец» КСУП “Вензавец”за 2016 год склала 3396 кілаграмаў малака на адну карову, што на 830 кілаграмаў менш за ўзровень 2015 года і на 1562 кілаграмы – за ўзровень 2014 года. На ферме «Васявічы» КСУП “Дварэц-Агра” летась вытворчасць малака знізілася на 30%. Надой малака на адну карову склаў 2204 кілаграмы ў год. Такія лічбы па надою старшыня райвыканкама Аляксандр Дубовік назваў недапушчальнымі.
На фермах гаспадарак, якія дапусцілі зніжэнне вытворчасці малака, адзначаецца і невысокая яго якасць. Разам з тым, у цэлым па раёне назіраецца станоўчая дынаміка росту рэалізацыі малака гатункам “Экстра”. Сёлета стабільна высокай якасці малако надойваюць фермы «Таркачы» і «Касцюкі» ААТ “Граніт-Агра” (больш за 90% складае гатунак “Экстра”), фермы «Краглі» і «Зачэпічы» КСУП “Жукоўшчына” (больш за 80%), на ферме «Парэчча» КСУП “Хвінявічы” (больш за 70%).
Асноўнымі прычынамі, якія прывялі да зніжэння вытворчасці малака, спецыялісты ўпраўлення сельскай гаспадаркі і харчавання райвыканкама лічаць нізкую забяспечанасць кармамі, недагляд у рабоце па вырошчванні цёлак, узнаўленні статка, недастатковае выдзяленне грашовых сродкаў на правядзенне прафілактычных і лячэбных мерапрыемстваў, недахоп ветэрынараў. Не вытрымліваецца тэхналогія ўтрымання жывёлін і сістэматычна парушаецца гігіена даення кароваў у гаспадарках “Вензавец”, “Слава працы”, “Дварэц-Агра”, “Русь-Агра”, “Жукоўшчына”, “Белагурна”. За пяць месяцаў бягучага года па раёне атрыманы 5205 цялят, што на 622 галавы менш за гэты ж перыяд 2016 года.
Кіраўнікі і спецыялісты сельгасарганізацый давалі тлумачэнні.
— Пры такіх лічбах гаварыць пра эканамічную эфектыўнасць не даводзіцца. Прашу навесці парадак на фермах, нацэліць спецыялістаў на выніковую работу. Сёння некаторыя дзятлаўскія гаспадаркі ў адным кроку ад банкруцтва і распродажу, – адзначыў намеснік старшыні Камітэта па сельскай гаспадарцы і харчаванні Гродзенскага аблвыканкама Ігар Сарокін.
Таксама спецыяліст засяродзіў увагу кіраўнікоў сельскіх гаспадарак на законе па ідэнтыфікацыі, рэгістрацыі, наглядзе за сельскагаспадарчымі жывёлінамі (статкамі), ідэнтыфікацыі і наглядзе за прадуктамі жывёльнага паходжання. Ён нагадаў, што ўжо са студзеня наступнага года арганізацыі, які не правядуць мерапрыемствы ідэнтыфікацыі статку, не змогуць рэалізаваць ні жывёлін, ні малако.
– Гродзеншчына заўсёды была ў лідарах па вытворчасці малака, але сітуацыя змянілася, у тым ліку з-за значных мінусаў у паказчыках дзятлаўскай сельскай гаспадаркі, і ніхто не будзе з гэтым мірыцца, — патлумачыў прычыну ўдзелу абласных спецыялістаў у пасяджэнні райвыканкама намеснік старшыні Камітэта дзяржаўнага кантролю Гродзенскай вобласці Аляксандр Садаўнічы. — Упэўнены, што кадры ў вас не горшыя, чым у іншых раёнах, трэба толькі “ўзбадзёрыцца”. Прыйшоў час зразумець, што нельга распыляцца, а неабходна вызначыць стратэгічныя накірункі, праграму далейшай работы.
Што датычыцца пытання рэалізацыі патрабаванняў Дэкрэта №5, па словах начальніка аддзела арганізацыйна-кадравай работы райвыканкама Сяргея Багдановіча, у Дзятлаўскім раёне праведзена неабходная тлумачальная работа па давядзенні патрабаванняў Дэкрэта да кіруючых кадраў, працоўных калектываў і насельніцтва раёна. Праводзіцца работа па забеспячэнні патрабаванняў антыкарупцыйнага заканадаўства.
Між тым начальніка галоўнага ўпраўлення арганізацыйна-кадравай работы Гродзенскага аблвыканкама Валерыя Клімовіча насцярожыла вялікая колькасць пакаранняў работнікаў, якія знаходзяцца ў кадравым рэестры райвыканкама.
Сёлета ўжо вынесены 14 вымоваў, 29 заўвагаў, 4 работнікі пазбаўлены выплатаў стымулюючага характару (прыцягнуты да дысцыплінарнай адказнасці: 3 намеснікі старшыні райвыканкама, 3 старшыні сельскіх выканаўчых камітэтаў, адзін начальнік аддзела райвыканкама, 2 намеснікі начальнікаў аддзелаў райвыканкама, 13 кіраўнікоў арганізацый раённага ўзроўню падпарадкавання; пазбаўлены выплатаў: 3 кіраўнікі, адзін дзяржаўны служачы).
Па ініцыятыве аддзела ўнутраных спраў райвыканкама на пасяджэнні было разгледжана пытанне захаванасці маёмасці грамадзян і юрыдычных асобаў Дзятлаўшчыны.
Начальнік аддзела Аляксандр Біль адзначыў, што 40% з усіх учыненых злачынстваў складаюць крадзяжы маёмасці ўсіх формаў уласнасці. Прычынай большасці крадзяжоў сталі бяспечныя адносіны гаспадароў да ўласнай маёмасці, неналежнае забеспячэнне работы вартавой аховы, слабая тэхнічная ўмацаванасць аб’ектаў.
Па кожным з абмеркаваных пытанняў прыняты адпаведныя рашэнні, і вызначаны тэрміны іх выканання.
І. КАМАРОВА
Фота аўтара
