Заслужаныя ўзнагароды

Зладжаная работа на палях раёна залежыць ад старання аграрыяў.

Штогод працоўнае спаборніцтва сярод удзельнікаў пасяўной кампаніі для механізатараў становіцца дадатковым стымулам у рабоце, а для прафсаюзаў – добрай нагодай заахвоціць адказных і працавітых хлебаробаў.

Менавіта з гэтай мэтай першы намеснік старшыні райвыканкама – начальнік упраўлення сельскай гаспадаркі і харчавання Віталій Шулейка і старшыня райкама прафсаюза работнікаў АПК Уладзімір Казак наведалі ААТ “Граніт-Агра”,  каб уручыць дыпломы і грашовыя прэміі Дзятлаўскага раённага камітэта прафсаюза работнікаў аграпрамысловага комплексу механізатарам, якія дасягнулі высокіх паказчыкаў на сяўбе яравых збожжавых і зернебабовых культур і на падрыхтоўцы глебы ў перыяд вясенняй пасяўной кампаніі.

Заслужаныя ўзнагароды атрымалі трактарысты-машыністы гаспадаркі Вадзім Майсейчык  і Дзмітрый Афанасік.

На адрас працаўнікоў палёў прагучала нямала добрых словаў.

– Наперадзе яшчэ шмат работы, – адзначыў Віталій Шулейка. – Але я ўпэўнены, што вам па плячы справіцца з любой пастаўленай задачай, што вы ўжо не аднойчы даказалі. Жадаю моцнага здароўя і дабрабыту, няхай ва ўсіх пачынаннях вам нязменна спадарожнічае поспех.

– Дзякуючы добрасумленнай працы і адказнаму стаўленню да сваіх прафесійных абавязкаў, вас добра ведаюць і цэняць не толькі ў гаспадарцы, але і ў раёне, – дадаў Уладзімір Казак. – Прыемна, што заслужаныя ўзнагароды мы ўручаем вам не ўпершыню. Упэўнены, што яшчэ не раз зазірну ў ААТ “Граніт-Агра” з гэтай ганаровай місіяй.

Кіраўнік гаспадаркі Станіслаў Мазур таксама далучыўся да віншаванняў. Ён  падкрэсліў важнасць выкананай механізатарамі работы, падзякаваў за адданасць роднай зямлі і адказную працу.

Вольга ЮШКЕВІЧ

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga