З узнагародамі, спажыўкааператары!

Узнагароды за працу атрымалі работнікі Дзятлаўскага філіяла Гродзенскага аблспажыўтаварыства.

За сумленную працу ім падзякавалі і ўручылі граматы і падзячныя лісты намеснік старшыні раённага выканаўчага камітэта Дзмітрый Баравік і дырэктар філіяла Мікалай Гародка.

– Ад работы вашай галіны ў многім залежыць дабрабыт і камфорт людзей, асабліва ў сельскай мясцовасці, – адзначыў Дзмітрый Баравік. – Зразумела, што ўзнікае нямала складаных пытанняў, аднак вы іх годна вырашаеце, пра што сведчаць і паказчыкі. З гэтага года ваш філіял рэарганізаваны – далучаны Навагрудскі ўчастак, павялічыліся аб’ёмы работы, аднак, упэўнены, што вы з усім справіцеся. Жадаю далейшых поспехаў, задаволеных кліентаў, моцнага здароўя і ўсяго найлепшага.

Дзмітрый Расціслававіч уручыў узнагароды раённага выканаўчага камітэта.

За шматгадовую сумленную працу Ганаровай граматай райвыканкама адзначаны дырэктар Дзятлаўскага філіяла Гродзенскага аблспажыўтаварыства Мікалай Гародка. Такой жа ўзнагароды ўдастоена начальнік рознічна-гандлёвага ўчастка № 1 Наталля Загдай. Падзячныя лісты райвыканкама ўручаны вядучаму бухгалтару Марыне Барысевіч, трактарысту транспартнай галіны Аляксандру Ярмаловічу.

Ганаровай граматай раённага Савета дэпутатаў узнагароджана начальнік сектара якасці Іна Бараноўская, падзячнымі лістамі Савета дэпутатаў – машыніст рэзальных машын Вольга Пілевіч, прадавец Алег Жданук.

За высокую ацэнку работы філіяла Мікалай Гародка падзякаваў кіраўніцтву райвыканкама і раённаму Савету дэпутатаў.

– Мы прыкладзём усе намаганні для выканання пастаўленых перад намі задач, – падкрэсліў Мікалай Віктаравіч. – Спажыўкааперацыя паказала сваю жыццяздольнасць у розных умовах і займае немалаважную долю ў эканоміцы. Гэта шматфункцыянальная арганізацыя, якая ахоплівае розныя сферы дзейнасці: гандаль, прамысловасць, грамадскае харчаванне, нарыхтоўкі, прадастаўленне паслугаў, транспарт, служыць народу, людзям, у першую чаргу – насельніцтву сельскіх рэгіёнаў. Аўтамагазіны даязджаюць у самыя аддаленыя куткі раёна, дзе мы імкнёмся забяспечыць высокую якасць абслугоўвання. Спадзяюся, усе нашы мэты будуць рэалізаваны, а мары ўвасоблены ў жыццё.

Ён уручыў Ганаровыя граматы Гродзенскага аблспажыўтаварыства агенту гандлёвай галіны Наталлі Радзюк, прыбіральшчыцы Тамары Шастак. Такія ж узнагароды перададзены начальніку аддзела тэхнічнага развіцця Рыгору Радоўню, слесару-сантэхніку Івану Лубешку і работнікам Навагрудскага ўчастка: вадзіцелю Віктару Зайко, прадаўцу Святлане Ігнатовіч.

Ірына СТЫРНІК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga