З чым звярнуліся дзятлаўчане на прафсаюзны прыём?

На базе Дзятлаўскага раённага цэнтра гігіены і эпідэміялогіі прайшлі прававая асвета і прафсаюзны прыём грамадзян.

 

Іх правялі намеснік пракурора Дзятлаўскага раёна Сяргей Аляшкевіч, галоўны прававы інспектар Гродзенскай абласной арганізацыі Беларускага прафсаюза работнікаў аховы здароўя Валянціна Таўрэль, старшыня раённага аб’яднання прафсаюзаў Аляксандр Дубовік. На сустрэчы з медыцынскімі работнікамі Валянціна Станіславаўна дала тлумачэнні па нормах заканадаўства, якія рэгулююць сферу працоўных і звязаных з імі праваадносінаў, растлумачыла змяненні, унесеныя ў Працоўны кодэкс Рэспублікі Беларусь і адказала на пытанні дзятлаўчан.

На прафсаюзны прыём звярнуліся чатыры чалавекі з пытаннямі, якія тычыліся забеспячэння арэндным жыллём на першым рабочым месцы, а таксама працоўных адпачынкаў. Па кожнай з тэм заяўнікам былі дадзены адказы і рэкамендацыі.

– З якімі пытаннямі найчасцей звяртаюцца на прафсаюзныя прыёмы?

– Медыкаў цікавяць многія аспекты жыцця і працы, – адказвае галоўны прававы інспектар. – Для маладых спецыялістаў найбольш актуальны жыллёвыя і бытавыя пытанні, частыя звароты, што тычацца дысцыплінарнай адказнасці медыцынскіх работнікаў і прымянення дысцыплінарных спагнанняў.

– Дзе атрымаць кансультацыю тым, хто не трапіў на прыём?

– Можна прыехаць на асабісты прыём у Гродна ў абласную арганізацыю, напісаць зварот або звярнуцца па тэлефоне.

Выязныя прафсаюзныя прыёмы грамадзян праводзяцца па ініцыятыве Федэрацыі прафсаюзаў Беларусі з 2015 года, яны даўно даказалі сваю карысць і запатрабаванасць. Грамадзяне актыўна карыстаюцца магчымасцю атрымаць бясплатную юрыдычную кансультацыю, а часта і канкрэтную дапамогу на месцы.

У рамках прыёму Валянціна Таўрэль правяла вучобу з калектывам Дзятлаўскага раённага цэнтра гігіены і эпідэміялогіі.

Наталля АВЯРЧУК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga