Як рыхтуюцца да Новага года ў сацыяльным прытулку

Па краіне крочыць рэспубліканская дабрачынная навагодняя акцыя “Нашы дзеці”.

Яна дорыць радасць і спадзяванне на шчаслівы цуд маленькім беларусам. Напярэдадні святаў мы вырашылі сустрэцца з з  юнымі дзятлаўчанамі, якія больш за іншых маюць патрэбу ў клопаце, падарунках і станоўчых эмоцыях, бо сустракаюць Новы год сацыяльна-педагагічнага цэнтра горада Дзятлава. У дзяцей і ў дырэктара ўстановы даведаліся, як тут ствараюць святочны настрой, якіх падарункаў чакаюць ад Дзядулі Мароза.

Ала Жэгалік, дырэктар:

– Калектыў цэнтра стараецца, каб дзецям у нас было па-хатняму ўтульна, каб вакол панавала прыгажосць, адчувалася свята і верылася ў лепшае. Шмат намаганняў спецыялісты патрацілі на упрыгожванне памяшканняў і прылеглай тэрыторыі. У нас з’явілася шмат упрыгажэнняў з паперы, нітак, лёну, іншых матэрыялаў. Каб задобрыць сімвал надыходзячага года, пры ўваходзе “пасялілі” белага пацучка з важкім кавалкам любімага ласунка – сыру. Дзеці нам актыўна дапамагалі ствараць усю гэту прыгажосць, а таксама намалявалі зімовыя пейзажы, зрабілі тэматычныя аплікацыі. Усе работы можна ўбачыць на выставе творчасці.

Акцыя “Нашы дзеці” прадаўжаецца, і добрым чараўніком для дзетак з нашага прытулка можа стаць любы жадаючы. Дапамагаць можна не толькі ў святы, але і ў іншы час, бо бытавых пытанняў, з якімі складана справіцца без падтрымкі, заўсёды хапае. Хочацца, каб у цэнтры было па-хатняму ўтульна, каб з’явілася больш развіваючых і настольных гульняў для выхаванцаў, спартыўнага інвентару.

У Дзядулі Мароза хачу папрасіць, каб нарэшце пайшоў снег, і дзецям удалося ў час канікулаў аддацца зімовым забавам. Для сацыяльна-педагагічнага цэнтра пажадаю новых камп’ютараў. Здароўя і цярпення – усяму нашаму дружнаму калектыву. Выхавнцам прытулка – клапатлівых любячых бацькоў, бо любому дзіцяці патрэбна сям’я. Жадаю, каб у новым годзе дзеці да нас траплялі радзей, а мы працавалі пераважна на прафілактыку.

Асобныя пажаданні – прыёмным сем’ям. Яны аддаюць сілы, дораць цяпло сваіх сэрцаў дзецям. Гэта нашы надзейныя партнёры, якім мы бясконца ўдзячны. Усім калегам у адукацыі жадаю не чарсцвець душой і не губляць сябе за паўсядзённымі праблемамі. Шчасця ўсім у новым годзе!

Кірыл, 6 клас:

– Я люблю навагоднія святы за падарункі, цукеркі, пачастункі. У якасці навагодняга падарунка мару атрымаць вялікага плюшавага мядзведзя. Таксама папрашу ў Дзядулі Мароза, каб я добра вучыўся, каб хутчэй вярнуўся дахаты, каб былі здаровыя родныя. Яшчэ мару пра экскурсію ў аквапарк.

Лёша, 2 клас:

– Вельмі люблю Новы год, бо ён вясёлы, дзецям дораць падарункі, усім радасна, на дварэ зіма. Хачу, каб сёлета Дзядуля Мароз падарыў мне сквіш, канструктар лега-вёску і лега-шахту, машынку на радыёкіраванні. Я загадаю яму некалькі сваіх жаданняў: вярнуцца дахаты, здароўя маме і родным і каб я добра вучыўся. Яшчэ мару паехаць у Белавежскую пушчу і паглядзець рэзідэнцыю Дзеда Мароза.

Артур, 2 клас:

– Зімой люблю гуляць у снежкі, будаваць снежную крэпасць, катацца на санках, атрымліваць навагоднія падарункі. У Дзеда Мароза папрашу, каб я добра вучыўся і каб ён мне падарыў гульню майнкрафт. Яшчэ папрашу паездку ў Белавежскую пушчу: у рэзідэнцыю Дзеда Мароза і зуброў паглядзець.

Валерыя, 1 клас:

– Я ўжо напісала пісьмо Дзеду Марозу. Папрасіла ў яго вялікую ляльку, бранзалецік, канструктар лега ў каробцы і дзіцячую дошку, на якой можна пісаць.

 

Ірына КАЎКЕЛЬ