Як працуюць настаўнікі?

У гімназіі № 1 горада Дзятлава  прайшоў раённы фестываль педагагічнага майстэртва “Ад ідэі да творчасці”, у якім прынялі ўдзел прадстаўнікі аддзела адукацыі, намеснікі дырэктараў устаноў агульнай сярэдняй адукацыі, вопытныя і маладыя педагогі.

З мэтай метадычнай падтрымкі педагогі сістэмы адукацыі раёна дзяліліся вопытам, накіраваным на павышэнне якасці прадметнага выкладання, прэстыжу педагагічнай прафесіі.

Адкрыла фестываль начальнік аддзела адукацыі Дзятлаўскага райвыканкама Наталля  Белаус. Яна адзначыла, што ў сістэме адукацыі раёна працуюць творчыя педагогі, якія маюць значныя дасягненні на ўзроўні вобласці і рэспублікі.

Загадчыца Дзятлаўскага раённага вучэбна-метадычнага кабінета Таццяна Кулеш зазначыла, што фестываль – гэта прэзентацыя і апрабацыя педагагічнай тэхнікі як вопытных педагогаў, чый вопыт правераны часам (Алена Баковіч, настаўніца біялогіі Новаельнянскай сярэдняй школы, Наталля Клімец, настаўніца геаграфіі гімназіі № 1 горада Дзятлава, Святлана Кетко, настаўніца інфарматыкі гімназіі № 1 горада Дзятлава, Людміла Самусевіч, настаўніца біялогіі Лявонавіцкага дзіцячага сада-базавай школы), так і маладых педагогаў раёна, якія толькі пачынаюць сваё ўзыходжанне да вяршынь, але ўжо імкнуцца падзяліцца сваімі напрацоўкамі (Анастасія Рагойжа, настаўніца рускай мовы Хвінявіцкага дзіцячага сада-сярэдняй школы).

Вопытам работы па фарміраванні даследчых кампетэнцый навучэнцаў і развіцці пазнавальнай актыўнасці праз даследчую дзейнасць дзяліліся Алена Баковіч і Людміла Самусевіч.

Прыярытэтнымі накірункамі дзейнасці сучаснай школы з’яўляюцца інфарматызацыя, прафесійнае і жыццёвае самавызначэнне навучэнца, стварэнне адукацыйнага асяроддзя для дзяцей з індывідуальнымі адукацыйнымі запатрабаваннямі. Вопыт работы па гэтых накірунках таксама прэзентаваўся ў час правядзення фестывалю (“Электронны рабочы сшытак як дыдактычны сродак дыстанцыйнага навучання”, Лідзія Жых, настаўніца беларускай мовы і літаратуры Дварэцкай сярэдняй школы; “Практыка-арыентаваны падыход – аснова працоўнага навучання”, Святлана Філатава, настаўніца працоўнага навучання Круцілавіцкага дзіцячага сада-сярэдняй школы; “Стварэнне адаптыўнага адукацыйнага асяроддзя на шляху да інклюзіўнай адукацыі”, настаўнікі-дэфектолагі сярэдняй школы № 3 горада Дзятлава).

У час фестывалю ўдзельнікі маглі наведаць дзесяць майстар-класаў, якія праводзілі педагогі гімназіі № 1, сярэдняй школы № 3 горада Дзятлава, Гезгалаўскай і Казлоўшчынскай сярэдніх школ, Вензавецкага, Хвінявіцкага і Раклевіцкага дзіцячых садоў-сярэдніх школ. Настаўнікі практычна дэманстравалі, як будуюць работу з навучэнцамі на ўсіх ступенях агульнай сярэдняй адукацыі. Удзельнікі фестывалю адзначылі, што заняткі ў майстар-класах далі магчымасць авалодаць новымі творчымі спосабамі вырашэння педагагічных праблем, садзейнічалі павышэнню матывацыі да самаўдасканалення.

Вольга ЮШКЕВІЧ