Такую назву сваёй творчай рабоце дала Кіра Калюцік, юная мастачка з Дзятлава, якая прыняла ўдзел у конкурсе дзіцячага малюнка, што праводзіў сайт “ОZ.BY” — буйнейшы інтэрнэт-магазін Беларусі.
Мастацкі конкурс быў прымеркаваны да 16-годдзя інтэрнэт рэсурсу. Удзел у творчым выпрабаванні прымалі юныя мастакі ва ўзросце ад 2 да 12 гадоў. Арганізатары конкурсу прапанавалі ім паразважаць над тэмай “Кім я стану праз 16 гадоў”.
Кіра Калюцік убачыла сябе ў будучым мастачкай. Азы творчасці яна пакуль яшчэ толькі асвойвае ў Дзятлаўскай дзіцячай школе мастацтваў, якую наведвае на працягу двух гадоў. Да гэтага Кіра разам са сваёй сяброўкай Ірынай Авярчук наведвала мастацкі гурток.
Паўдзельнічаць у мастацкім конкурсе сайта “OZ.BY” Кіры прапанавала яе мама. Над малюнкам дзяўчынка працавала на працягу вечара, аднак, тым не менш, яе работа ўвайшла ў тройку лепшых.
Малюнак “Я мастак. Восень” зможа пабачыць шырокае кола гледачоў. Работы пераможцаў конкурсу ўпрыгожылі серыю лімітаваных паштовак, якую выпусціў інтэрнэт-рэсурс “ОZ. BY”. Сродкі ад продажу паштовак пойдуць на дабрачынныя мэты.
А. ДУБРОЎСКАЯ
Фота П. АДАМЧУКА
