Вандроўкі. Падарожнічайце самі, падарожнічайце з намі!

Летнія экскурсійныя паездкі ўжо сталі традыцыйнымі для ўдзельнікаў клуба «Нам гады не бяда», які функцыянуе на базе Цэнтра сацыяльнага абслугоўвання насельніцтва Дзятлаўскага раёна. Лета-2017 пачалося з паездкі ў вёску Горка Дзятлаўскага раёна. У гэтай паездцы да нас, пенсінераў, далучылася аддзяленне дзённага знаходжання для інвалідаў «Праменьчык» і валанцёры таварыства Чырвонага Крыжа.

На пачатку мы накіраваліся да знакамітых камянёў, якія знаходзяцца на гары. Згодна з традыцыяй, прапаўзлі пад імі тры разы. Пасля чаго наведалі маленькую каплічку, якая знаходзіцца побач. За капліцай у некалькіх метрах ад камянёў мы ўбачылі старыя крыжы, заржавелыя ад часу і непагадзі. Крыху пастаялі і памаліліся гэтаму месцу, затым накіраваліся да святой крыніцы. Старажылы лічаць яе гаючай і могуць расказаць, ад якіх хваробаў дапамагае сцюдзёная крынічная вада. А мы, назапасіўшы вады і прыемных уражанняў, вырашылі, што прыспеў час вяртацца дахаты.

Па дарозе разважалі, што многія карэнныя жыхары Дзятлаўшчыны здзіўляюцца, калі чуюць, што ў нашым раёне ёсць такія святыя мясціны, як вёска Горка. Сюды прыязджаюць людзі з іншых рэгіёнаў Беларусі і нават з-за мяжы. Нам таксама прыемна было далучыцца да гістарычнай спадчыны продкаў, адчуць дух святога месца.

У бліжэйшых планах клуба «Нам гады не бяда» — наведванне аграсядзібаў Дзятлаўскага раёна і паездка ў Свята-Елісееўскі Лаўрышэўскі манастыр, што на Навагрудчыне. «Падарожнічайце самі, падарожнічайце з намі!» — адзін з дэвізаў клуба, і мы запрашаем актыўных, жыццярадасных людзей залатога ўзросту далучацца да нашага аб’яднання.

Г. КАСЦЮК, Т. ЗІНКЕВІЧ,

спецыялісты Цэнтра сацыяльнага абслугоўвання насельніцтва Дзятлаўскага раёна