Увага – на якасць жыцця і патрэбы людзей

6 мая ў райвыканкаме адбылася справаздачная сесія раённага Савета дэпутатаў 29 склікання пад кіраўніцтвам старшыні райсавета Аляксандра Бараноўскага.

З асноўным пытаннем – справаздачай Дзятлаўскага раённага Савета дэпутатаў аб рабоце за 2024 год – выступіў Аляксандр Бараноўскі. – Падводзячы вынікі і аналізуючы зробленае ў мінулым годзе, варта адзначыць, што паўсядзённая дзейнасць мясцовых Саветаў дэпутатаў звязана з рашэннем шырокага спектра пытанняў палітычнага, сацыяльнага і эканамічнага характару, – падкрэсліў Аляксандр Станіслававіч. – Пры вялікай разнастайнасці напрамкаў дзейнасці сумарны вектар скіраваны на дасягненне галоўнай мэты мясцовага самакіравання – павышэнне ўзроўню якасці жыцця насельніцтва. Наколькі эфектыўна вырашаюцца задачы па дасягненні гэтай мэты, у многім залежыць ад персанальнай работы дэпутацкага корпуса. Сёння мясцовыя Саветы маюць больш магчымасцяў ажыццяўляць сваю дзейнасць на карысць грамадзян. Цесныя стасункі з выбаршчыкамі дазваляюць глыбей унікнуць у праблемы і патрэбы людзей, зірнуць на сітуацыю іх вачамі.

Структура выбарных органаў у Дзятлаўскім раёне прадстаўлена раённым Саветам дэпутатаў і дзевяццю сельскімі, адной з важнейшых формаў іх дзейнасці з’яўляюцца сесіі, дзе калектыўна вырашаюцца многія найбольш актуальныя пытанні, аднесеныя законам да кампетэнцыі Саветаў. У 2024 годзе праведзена 11 сесій, разгледжана 57 рашэнняў па важных стратэгічных напрамках развіцця раёна.

Падрабязна Аляксандр Бараноўскі спыніўся на рабоце раённага Савета дэпутатаў па інфармаванні насельніцтва і павышэнні прававой культуры грамадзян, патрыятычным выхаванні, дзейнасці сельскіх Саветаў дэпутатаў, электаральнай кампаніі, рабоце са зваротамі грамадзян, узаемадзеянні з моладзевым парламентам пры раённым Савеце дэпутатаў, удзеле дэпутацкага корпусу ў рабоце дыялогавых пляцовак, акцыях і мерапрыемствах, прымеркаваных да важных дзяржаўных святаў.

Ён акцэнтаваў увагу прысутных на важнасці такіх кірункаў дзейнасці, як навядзенне парадку на зямлі, работа з Указам Прэзідэнта Рэспублікі Беларусь ад 24 сакавіка 2021 года № 116 “Аб адчужэнні жылых дамоў у сельскай мясцовасці і ўдасканаленні работы з пустуючымі дамамі”,  добраўпарадкаванне населеных пунктаў, акрэсліў значнасць ролі інстытута сельскіх старастаў, інфармацыйна-тлумачальнай работы сярод жыхароў, правядзення суботнікаў. Адным са спосабаў перадачы станоўчага вопыту ў гэтым кірунку назваў Дні сельскіх саветаў, з дапамогай якіх не толькі “прывіваецца мода” на прыгажосць, але і павышаецца матывацыя мясцовых уладаў і насельніцтва.

Значную ўвагу ў сваім выступленні старшыня раённага Савета дэпутатаў надаў пытанням занятасці і рабоце пастаянна дзеючай камісіі па каардынацыі работы па садзейнічанні занятасці ў рамках рэалізацыі Дэкрэта Прэзідэнта № 3, прафілактыцы пажараў і іншых негатыўных з’яваў,  рабоце аглядавых камісій.

Напрыканцы Аляксандр Бараноўскі адзначыў, што шырокае выкарыстанне розных формаў работы мясцовага самакіравання дазваляе трымаць руку на пульсе грамадска-палітычнага і сацыяльна-эканамічнага жыцця раёна, і такая работа будзе прадоўжана ў бягучым годзе.

У рамках работы сесіі таксама вырашаны і зацверджаны іншыя пытанні, вынесеныя на разгляд раённага Савета дэпутатаў.

Ірына СТЫРНІК