Установы адукацыі: што зроблена, дзе ідуць рамонты?

Добраўпарадкаванне, павышэнне ўзроўню бяспекі, папаўненне матэрыяльна-тэхнічнай базы – усё гэта вельмі важна, асабліва калі тычыцца будучыні краіны – нашых дзяцей.

– Падрыхтоўка да новага навучальнага года на Дзятлаўшчыне пачынаецца задоўга да летніх канікулаў, практычна адразу ж у верасні, – расказала начальнік аддзела адукацыі райвыканкама Марына Лашкоўская. – Планаванне ажыццяўляецца паступова: адсочваецца, дзе ёсць неабходнасць у абнаўленні матэрыяльна-тэхнічнай базы, выкананні санітарна-эпідэміялагічных мерапрыемстваў, іншых момантаў. Безумоўна, пік работ прыпадае на час летніх канікулаў. Аддзел адукацыі выдае загад, вызначае састаў міжведамаснай камісіі, у якую ўваходзяць прадстаўнікі адказных службаў раёна, для праверкі ўстановаў і зацвярджэння актаў іх гатоўнасці. Калі выяўляюцца недахопы, то яны павінны быць ухілены да сярэдзіны жніўня. Сёлета гэта 11-13 жніўня, калі будзе ажыццяўляцца камісійны выезд па канчатковай ацэнцы гатоўнасці ўстановаў адукацыі да 2026-2027 навучальнага года з наступным падпісаннем пашпартоў гатоўнасці.

У нашым раёне сферы адукацыі надаецца грунтоўная ўвага, і значная частка матэрыяльнай падтрымкі на рамонты і набыццё абсталявання – гэта менавіта сродкі мясцовага бюджэту. Напрыклад, ужо выкананы бягучы рамонт даху сярэдняй школы № 1 горада Дзятлава імя А. М. Чурылы на 89 400 рублёў і за 23 100 рублёў наладжана сістэма вулічнага асвятлення. У дзіцячым садзе № 2 райцэнтра, Казлоўшчынскім і Новаяльнянскім дзіцячых садах поўнасцю заменены вокны, завершана іх замена ў гімназіі № 1 горада Дзятлава, у гэтай жа ўстанове цяпер ажыццяўляецца рамонт фасаду з вонкавага боку і правядзенне вулічнага асвятлення. Ва ўсіх установах адукацыі дадаткова будуць устаноўлены камеры відэаназірання. У Новаяльнянскім дзіцячым садзе ідзе ўкладка тратуарнай пліткі. На суму 29 240 рублёў для гімназіі, Новаяльнянскай, Гезгалаўскай, Хвінявіцкай сярэдніх школ і сярэдніх школ № 1 і № 3 горада Дзятлава набыта мэбля для навучэнцаў.

Скончаны рамонт харчблока ў Дварэцкай сярэдняй школе, для Круцілавіцкай – набыта пасудамыечная машына, амаль ва ўсе ўстановы закуплены здрабняльнікі харчовых адходаў, мабільныя кандыцыянеры, вентылятары, электраводанагравальнікі.

Нямала ўвагі надаецца папулярызацыі сярод падрастаючага пакалення спорту і здаровага ладу жыцця. Шматфункцыянальная спартыўная пляцоўка адкрыта у Новаяльнянскай сярэдняй школе імя А. А. Шаўчук, і у стадыі завяршэння варкаўтпляцоўка ў Гезгалаўскай сярэдняй школе імя. М. І. Нядзеліна. З раённага бюджэту выдаткаваны сродкі на рамонт бегавых дарожак у Круцілавіцкай базавай і Хвінявіцкай сярэдняй школах, на абнаўленне спартыўнага інвентара і абсталявання патрачана 9994 рублі.

Самаходныя газонакасілкі будуць набыты для Казлоўшчынскай і сярэдняй школы № 3 горада Дзятлава. На ўдасканаленне безбар’ернага асяроддзя скіраваны 15 000 сродкаў раённага бюджэту. Выдзелены яны і на бягучыя рамонты ў гімназіі, Новаяльнянскай, сярэдняй школе № 1 горада Дзятлава. Для Гезгалаўскай сярэдняй школы на закупку камп’ютарнай тэхнікі і мульцібордаў скіравана 30 000 рублёў. Па выніках удзелу ў рэспубліканскім этапе алімпіяды па хіміі выдаткаваны грошы на пакупку рэактываў для кабінетаў хіміі раёна.

Ажыццяўляліся бягучыя рамонты цеплапунктаў у Дварэцкай, Гезгалаўскай і Казлоўшчынскай сярэдніх школах (на 11 640 рублёў), электразабеспячэння і ацяплення ў Новаяльнянскай сярэдняй школе (7167), трубаправода ў Раклевіцкай пачатковай школе (4035). Набор для робататэхнікі на 5400 рублёў закуплены ў сярэднюю школу № 3 горада Дзятлава.

За сродкі абласнога бюджэту сёлета плануецца набыць школьны аўтобус на 16 месцаў.

Ірына СТЫРНІК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашелучшее #нашалепшае