Урок мужнасці

23 лютага наступнага года Узброеным Сілам Беларусі споўніцца 100 гадоў. Напярэдадні юбілею з 1 па 8 верасня работнікі айчынных ваенных установаў арганізавалі ўрокі мужнасці для вучняў старэйшых класаў. Патрыятычную акцыю для падлеткаў горада і раёна правялі і работнікі Дзятлаўскага раённага ваеннага камісарыята.

Начальнік групы прызыву на ваенную службу старшы лейтэнант Павел Бараноўскі распавёў хлопцам пра гісторыю сучаснага беларускага войска і падкрэсліў, што айчынная армія пастаянна ўдасканальваецца і развіваецца.

Школьнікі даведаліся, што атрымаць ваенна-ўлiковую спецыяльнасць можна і праходзячы службу ў рэзерве. Гэта значыць, што на працягу службовага тэрміну маладому чалавеку два разы на год трэба праходзіць зборы, якія доўжацца да паўтара месяца, а вучоба пры такім распарадку толькі баявая. Ад асноўнай працы салдату ў рэзерве адрывацца не абавязкова.

У Беларусі падрыхтоўка афіцэраў для Узброеных Сіл вядзецца ў Ваеннай акадэміі. Акрамя акадэміі, існуе яшчэ сем ваенных факультэтаў вышэйшых грамадзянскіх навучальных установаў. Яшчэ пяць ваенных кафедраў ажыццяўляюць падрыхтоўку афіцэраў запасу.

Жадаючым паступіць у ваенныя навучальныя ўстановы неабходна напісаць заяву ў ваенны камісарыят па месцы жыхарства (да 1 красавіка);

прайсці прафесійны адбор, у які ўваходзяць прафесійна-псіхалагічны адбор па адпаведнасці абранай спецыяльнасці, медыцынскі агляд і праверка ўзроўню фізічнай падрыхтаванасці.

На ўроку мужнасці распавялі пра Вялікую Перамогу, якая была дасягнута, дзякуючы гераічнай барацьбе з ворагам.

Будучых абаронцаў заклікалі праяўляць мужнасць і цвёрдасць у любой сітуацыі.

Ю. БАКУНОВІЧ
Фота аўтара