Свята 3 ліпеня: адкрыццё персанальнай выставы мастака Івана Козела

Дзятлаўскі гісторыка-краязнаўчы музей падрыхтаваў выставу нашага земляка, члена Беларускага союза мастакоў Івана Козела.  Яна адкрылася 3 ліпеня на другім паверсе Цэнтра культуры і народнай творчасці.

На адкрыцці прысутнічаў сам мастак, які прадаставіў для знаёмства са сваёй творчасцю 30 палотнаў. На многіх з іх – краявіды і архітэктура Дзятлаўшчыны. Гэта карціны “Дзятлаўская старонка”, “Цёпла вечар каля палаца ў Дзятлаве”,”Летні дзень у Дзятлаве”, “Возера каля вёскі Явар”, “Вензавец”, “Зіма ў Гнаінскіх” і іншыя. Нездарма персанальная выстава мае назву “Зямля мая – зямля бацькоў”.

У вёсцы Гнаінскія знаходзіцца бацькоўская хата, куды нярэдка наведваецца Іван Мікалаевіч Козел разам з братам Юрам, таксама мастаком. На Дзятлаўшчыне будучы мастак вучыўся, закончыў Герніцкую васьмігадовую школу.

Затым была вучоба ў Бабруйскім мастацкім вучылішчы, Беларускай акадэміі мастацтваў, стажыроўка ў творчых майстэрнях, удзел у шматлікіх рэспубліканскіх і міжнародных мастацкіх выставах. Цяпер Іван Козел працуе выкладчыкам у гімназіі-каледжы мастацтва імя І. В. Ахрэмчыка, працягвае пісаць карціны, ладзіць выставы.

Пра ўсё гэта мастак расказаў у час адкрыцця выставы. З гэтай адметнай падзеяй, а таксама 55-годдзем з дня нараджэння Івана Мікалаевіча Козела павіншавалі родныя, сябры, прадстаўнікі грамадскасці. Мастак перадаў музею сваю карціну, як даніну ўдзячнасці за шматгадовае плённае супрацоўніцтва.

Прысутныя на адкрыцці выставы знаёміліся з работамі нашага земляка пад гукі скрыпак.

Гэтая персанальная выстава мастака ў Дзятлаве не першая. З работамі Івана Козела дзятлаўчане і госці горада знаёміліся ў 1995-ым, 2003-ім, 2012 гадах. І вось – новая сустрэча. Выстава ў Цэнтры культуры і народнай творчасці пагасцюе на працягу пяці дзён, а затым яе перавязуць у Дзятлаўскі гісторыка-краязнаўчы музей. Хто не паспеў пабачыць работы нашага земляка, можа наведаць музей.

І. Іванава
Фота аўтара