«Стартуем разам»

Спартыўнае свята пад такой назвай, прымеркаванае да Міжнароднага дня абароны дзяцей, было арганізавана для выхаванцаў класаў і групаў інтэгрыраванага навучання і Цэнтра карэкцыйна-развіваючага навучання і рэабілітацыі горада Дзятлава. У мерапрыемстве прынялі ўдзел больш за 20 дзяцей з асаблівасцямі псіхафізічнага развіцця. Іх падтрымлівалі валанцёры, педагогі і госці свята — старшыня раённай арганізацыі грамадскага аб’яднання «Беларускі саюз жанчын» А. І. Жадзейка, галоўны спецыяліст аддзела адукацыі, спорту і турызму райвыканкама А. А. Чайкоўская.

Удзельнікаў спартыўнага свята і іх балельшчыкаў павітала А. І. Жадзейка і пажадала спартыўнага запалу, добрага настрою і бадзёрасці ў час падарожжа па спартыўных пляцоўках.

Практыкаванні, прапанаваныя дзецям з асаблівасцямі псіхафізічнага развіцця, былі скіраваны на развіццё рухальнай актыўнасці і ўмацаванне здароўя. Пляцоўкі са спартыўнымі заданнямі ўдзельнікі наведвалі адпаведна свайму ўзросту і фізічным магчымасцям. Праходзіць выпрабаванні ім дапамагалі педагогі і валанцёры. Паміж заданнямі для юных спартсменаў былі арганізаваны музычныя паўзы з танцамі. Песні падрыхтавалі навучэнцы сярэдняй школы №1 горада Дзятлава.

Напрыканцы сустрэчы ўсе юныя ўдзельнікі спартыўнага свята атрымалі дыпломы «За поспехі ў спаборніцтвах», падарункі ад спонсараў і раённай арганізацыі Беларускага саюза жанчын.