Славе і традыцыям – жыць у пакаленнях (+відэа)

Урачыстае мерапрыемства, прымеркаванае да 74-годзя Перамогі ў Вялікай Айчыннай вайне прайшло 4 мая ў Дзятлаве ля абеліска Славы.

Удзел у ім прыняло кіраўніцтва раёна, прадстаўнікі працоўных калектываў і грамадскіх арганізацый, вайскоўцы, духавенства, жыхары райцэнтра.

– 9 мая наша краіна будзе адзначаць Дзень Перамогі, які на працягу многіх дзесяцігоддзяў з’яўляецца самым светлым святам для грамадзян Беларусі, – адкрываючы ўрачыстасць, зазначыў старшыня Дзятлаўскага раённага Савета дэпутатаў Аляксандр Бараноўскі. – У гэты дзень змоўклі гарматы і рухавікі ваеннай тэхнікі, але ніколі не павінна замаўчаць наша памяць аб тых трагічных падзеях. Мы заўсёды будзем памятаць гэты дзень, як дзень выратавання чалавецтва.

Да віншаванняў з надыходзячым святам далучыўся старшыня Дзятлаўскага раённага выканаўчага камітэта Аляксандр Дубовік. Ён падкрэсліў, што перамога ў Вялікай Айчыннай вайне – набытак савецкага народа, часткай якога былі беларусы. Залатымі літарамі ўпісана гэта свята ў гісторыю нашай дзяржавы. Мы бязмежна ўдзячны тым, хто адстаяў нашу свабоду, і беражліва захоўваем іх запавет: любіць Айчыну, абараняць яе інтарэсы, данесці да маладога пакалення памяць аб вайне, каб нашы дзеці навучыліся любіць сваю зямлю так, як любілі яе дзяды і прадзеды. Няхай Дзень Перамогі аб’ядноўвае пакаленні, дасць нам новыя сілы ў імкненні зрабіць нашу Беларусь шчаслівай і квітнеючай.

З 74-ай гадавінай Вялікай Перамогі дзятлаўчан і гасцей свята павіншавалі ваенны камісар Дзятлаўскага раёна Генадзь Суравец, першы сакратар раённага камітэта ГА “БРСМ” Кацярына Хілімончык, благачынны цэркваў Дзятлаўскай акругі іерэй Іаан Кісель, ксёндз-пробашч Дзятлаўскай парафіі Здзіслаў Пікула.

Удзельнікі ўрачыстасці ўшанавалі памяць загінулых хвілінай маўчання і ў знак пашаны да подзвігаў ваеннага пакалення ўсклалі кветкі, вянкі і гірлянды да абеліска Славы.

Ірына СТЫРНІК