Школьны мерыдыян

Галасамі тых, хто змоўк назаўсёды

Навучэнцы 8-11 класаў сярэдняй школы № 1 горада Дзятлава імя А. М. Чурылы наведалі мерапрыемства ў ГрДУ імя Я. Купалы “Галасы тых, хто змоўк навекі” ў фармаце музычна-літаратурнага паказу. Проза і вершы пра франтавыя будні, каханне, страты і надзеі перапляталіся з несмяротнымі мелодыямі ваенных гадоў. Артысты змаглі перадаць увесь спектр чалавечых эмоцый: ад горычы першых дзён вайны да радасці доўгачаканай Перамогі. Дзеці ўбачылі, якой цаной дастаўся мір, а старэйшае пакаленне змагло яшчэ раз успомніць страшныя кадры з дакументальнай ваеннай хронікі і мастацкіх фільмаў аб вайне. Такія сустрэчы аб’ядноўваюць людзей, нагадваючы аб тым, як важна шанаваць мірнае неба над галавой і не забываць урокі мінулага.

Выбар на карысць свабоды

У 4 “Б” класе сярэдняй школа № 1 ў рамках прафілактычнага месячніка “ПА-ЗАзалежнасцю” адбылася тэматычная класная гадзіна “Наркаманія: ведаць, каб не спатыкнуцца”, накіраваная на фарміраванне ў вучняў свядомага стаўлення да здароўя і навыкаў бяспечных паводзін. Мерапрыемства прайшло ў інтэрактыўнай форме. Навучэнцам растлумачылі, чаму важна ўмець распазнаваць небяспечныя сітуацыі, як граматна казаць “не” і да каго звяртацца за дапамогай, калі ціск аднагодкаў або незнаёмых людзей становіцца невыносным. У час заняткаў дзеці разбіралі навучальныя сітуацыі, удзельнічалі ў міні-дыскусіях, складалі “кодэкс здаровага выбару” і вучыліся адрозніваць праўду ад распаўсюджаных міфаў.

Памяць, якой нельга здрадзіць

Навучэнцы гімназіі № 1 горада Дзятлава здзейснілі паездку ў мемарыяльны комплекс “Трасцянец” – месца, дзе ў гады вайны нацыстамі быў арганізаваны адзін з найбуйнейшых лагераў смерці. Гімназісты даведаліся, што нацысты спальвалі тут целы людзей, каб схаваць сляды злачынстваў, а попел і косці раскідвалі па палях. У Трасцянцы загінулі не менш за 546 тысяч чалавек –мірных жыхароў, ваеннапалонных, яўрэяў, прывезеных з Аўстрыі, Польшчы, Францыі і Германіі. Асабліва ўразіў дзяцей галоўны манумент – 10-метровая бронзавая скульптура “Брама памяці”, дзе знясіленыя целы вязняў пераплятаюцца з калючым дротам. Замест страшных лічбаў экскурсавод гаварыў аб простых і важных рэчах: кошце міру і аб тым, як важна памятаць тых, каму мы абавязаны сваёй свабодай.

Сёння на месцы былога канцлагера працягваецца праца па ўшанаванні памяці: тут устанавілі памятны знак “Дрэва жыцця”, а ў планах – будаўніцтва інфармацыйнага цэнтра з сучаснай музейнай экспазіцыяй.

Дзеці ўшанавалі памяць ахвяр ля “Дарогі смерці”, якая вядзе да месца масавых расстрэлаў ва ўрочышчы Благаўшчына.

Падрыхтавала Таццяна САНЮК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga