Школьны мерыдыян

Вясновы працоўны дэсант

З надыходам вясны з’явілася неабходнасць прывесці ў парадак свой двор, гарадок ці вёску, зрабіць іх чысцейшымі і прыгажэйшымі.

Навучэнцы Дварэцкай сярэдняй школы прынялі актыўны ўдзел у працоўным дэсанце. У першую чаргу яны прыбралі тэрыторыю школы, выграблі сухую леташнюю траву.

У рамках акцыі “#Памяць#Адзінства #ПЕРАМОГА” вучні навялі парадак на тэрыторыі пахаванняў воінаў і мірных жыхароў, загінулых у гады Вялікай Айчыннай вайны.

 Разам за здаровую будучыню

Педагогі і навучэнцы гэтай жа школы таксама прынялі актыўны ўдзел у рэалізацыі міжведамаснай прафілактычнай акцыі “Разам за здаровую будучыню”.

Для класных кіраўнікоў, педагога сацыяльнага сумесна са спецыялістамі сацыяльна-педагагічнага цэнтра горада Дзятлава прайшло пасяджэнне круглага стала па тэме “Тактыка выяўлення непаўналетніх, якія знаходзяцца ў стане наркатычнага ап’янення”.

Для навучэнцаў 6-11 класаў участковым інспектарам інспекцыі па справах непаўналетніх Мікалаем Філіповічам праведзена прафілактычная гутарка “Адказнасць непаўналетніх за незаконны абарот і захоўванне наркатычных сродкаў, а таксама за іх закладку”.

Каб не здарылася  бяды

У 2 “А” класе сярэдняй школы № 1 горада Дзятлава прайшла  класная гадзіна “Беражыся бед, пакуль іх няма”. Мэта мерапрыемства – данесці да  кожнага дзіцяці інфармацыю аб тым, як зберагчы сябе ў любой жыццёвай сітуацыі, правільна дзейнічаць, знаць і помніць нумары тэлефонаў экстранных службаў.

Дзеці пагарталі старонкі вуснага часопіса, паўтарылі асноўныя правілы дарожнага руху, пажарнай і электрабяспекі, пазнаёміліся з кніжнай выставай “Бяспека – гэта важна”, дзе побач з кнігамі быў прадстаўлены і часопіс “Юны ратаўнік”. Таксама былі выведзены адзіныя правілы асабістай бяспекі: НЕ затрымлівайся на вуліцы па дарозе са школы, НЕ гуляй позна, НЕ пускай у дом незнаёмца, нікуды НЕ ідзі з незнаёмым чалавекам.

Падрыхтавала Таццяна САНЮК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga