У Цэнтры культуры і народнай творчасці горада Дзятлава адбыўся святочны канцэрт, прымеркаваны да 170-годдзя з дня ўтварэння пажарнай службы Беларусі.
Павіншаваць супрацоўнікаў і ветэранаў Дзятлаўскага РАНС з юбілейнай датай прыйшлі прадстаўнікі кіраўніцтва раёна на чале са старшынямі райвыканкама Андрэем Садоўскім і раённага Савета дэпутатаў Аляксандрам Бараноўскім, супрацоўнікі сілавых структур.
– Паважаныя работнікі пажарнай службы! Ваша структура прайшла шлях у больш чым паўтара стагоддзя. Калі першапачаткова работа пажарных заключалася ў ліквідацыі пажараў, то сёння вы паспяхова можаце змагацца з усімі стыхіямі, якія існуюць, у тым ліку з аварыямі тэхнагеннага характару. Мы ганарымся тым, што ў 2022 годзе былі створаны сучасныя камфортныя ўмовы для вашай работы – пабудавана і адкрыта новае пажарнае дэпо ў Дзятлаве. Вы маеце ўсе неабходныя механізмы і тэхніку, здольны вырашаць любыя пастаўленыя задачы, – звярнуўся да прысутных Андрэй Садоўскі. – Хачу выказаць словы ўдзячнасці ветэранам, якія стаялі ля вытокаў утварэння пажарнай службы, і малодшаму пакаленню, якое дастойна прадаўжае закладзеныя традыцыі. З гэтай прафесіяй звязаны мужнасць і гераізм, няма больш моцных духам людзей, чым ратаўнікі, якія выратоўваюць людзей і дапамагаюць ім. Жадаю вам міру, дабрабыту, здароўя. Няхай як мага радзей гучаць сігналы пажарных сірэн.
Андрэй Уладзіміравіч уручыў Падзячныя лісты старшыні Дзятлаўскага райвыканкама вадзіцелю ПАВП № 14 Арцёму Іванчыку, дыспетчару цэнтра аператыўнага кіравання аддзела Яўгену Пранюку, ветэранам пажарнай службы Сяргею Малышчыку, Івану Губко.
Да словаў віншавання далучыўся Аляксандр Бараноўскі:
– Вы дастойна несяце сваю службу, каб спакойна жылі вашы родныя, землякі, дзеці мелі бяспечнае дзяцінства. Шчырае дзякуй вам за вашу высакародную працу!
Ён пажадаў ратаўнікам і іх сем’ям моцнага здароўя, «сухіх рукавоў», шчасця і дабрабыту.
Аляксандр Станіслававіч уручыў Падзячныя лісты старшыні Дзятлаўскага раённага Савета дэпутатаў намесніку начальніка РАНС Аляксандру Беленку, начальніку ПАВП № 14 Дзянісу Болтачу.
Калектыў раённага аддзела па надзвычайных сітуацыях павіншаваў яго начальнік Сяргей Казушчык:
– Сённяшні дзень – даніна гісторыі, людзям, якія стваралі гэту службу ў далёкім 1853 годзе. Яны заклалі асновы традыцый, якія мы свята шануем. Прыклад іх мужнасці, самаадданасці ў ліквідацыі пажараў і выратаванні людзей – яркі ўзор служэння Радзіме. Вашы нашчадкі сёння дастойна нясуць службу дзеля росквіту сваёй роднай краіны.
Ад калектыву Дзятлаўскага РАНС і сябе асабіста ён падзякаваў ветэранам пажарнай службы, якія з’яўляюцца заўжды жаданымі гасцямі на святочных мерапрыемствах.
З нагоды свята нагрудны знак МНС Рэспублікі Беларусь “Выдатнік” ён уручыў вадзіцелю ПАСП № 14 Юрыю Гізоўскаму. Чарговае спецыяльнае званне “старшы прапаршчык унутранай службы” было прысвоена вадзіцелю ПАВЧ № 1 Сяргею Бранкоўскаму; Падзяка начальніка абласнога упраўлення МНС аб’яўлена старшаму інжынеру аддзела Дзмітрыю Лянцэвічу, старшаму інструктару-ратаўніку ПАВЧ № 1 Дзмітрыю Ляўкевічу. Ганаровай граматай Гродзенскага абласнога ўпраўлення МНС быў узнагароджаны старшы інструктар па кіраванні пажарнай машынай, вадзіцель Аляксандр Журскі, граматай упраўлення – старшы вадзіцель ПАВЧ № 1 Алег Конан.
Памятным нагрудным знакам “165 гадоў пажарнай службе», а таксама юбілейнымі медалямі “20 гадоў БГА “Ратаўнік” і “20 гадоў органам і падраздзяленням па надзвычайных сітуацыях Рэспублікі Беларусь” былі адзначаны супрацоўнікі і ветэраны Дзятлаўскага РАНС.
Віншавальны адрас ад прадстаўнікоў сілавога блока Дзятлаўшчыны агучыў начальнік раённага аддзела Дэпартамента аховы Сяргей Кулеш і ўручыў узнагароду Сяргею Казушчыку.
На працягу канцэрта музычныя падарункі ратаўнікам раёна дарылі Вольга Кузьма, Ала Чарняўская, Таццяна Дудкіна, Генадзь Суравец, Аксана Шэйна, Сяргей Малышчык, ансамбль “Лэйла”.
Мерапрыемства завяршылася традыцыйным фота на памяць, на якім сустрэліся разам розныя пакаленні ратаўнікоў раёна.
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga