Рабочую паездку ў Дзятлаўскі раён 13 чэрвеня здзейсніў намеснік старшыні Гродзенскага аблвыканкама Віктар Лісковіч (абноўлена)

У першай палове дня ён прыняў удзел у правядзенні Адзінага дня інфармавання па тэмах “Нацыянальная турыстычная індустрыя. Забяспячэнне даступнасці паслуг па арганізацыі ўнутранага турызму для беларускіх грамадзян. Бязвізавы парадак уезду у Беларусь”; “Аб ходзе выканання Дэкрэта Прэзідэнта Рэспублікі Беларусь ад 15 снежня 2014 года №5 “Аб узмацненні патрабаванняў да кіруючых кадраў і работнікаў арганізацый”, “Аб рэалізацыі раённага праекта “Лета-2017 – час сацыяльна значных справаў асабовага самаўдасканалення”. У памяшканні Наваельнянскага сельсавета Віктар Андрэевіч сустрэўся з жыхарамі пасёлка. Удзельнікі сустрэчы былі паінфармаваны па пытаннях Адзінага дня інфармавання, у рамках названай тэматыкі адбылася дыскусія. Датычылася яна, у прыватнасці, часу пачатку заняткаў у школе, школьных падручнікаў, “дарожнай карты”школьнікаў на канікулах.

Віктар Андрэевіч Лісковіч выказаў свой погляд на гэтыя праблемы. Канікулярная “дарожная карта”, на яго думку, сапраўды патрэбна, яна дапамагае кантраляваць вольны час школьнікаў для іх жа бяспекі. Змест і мова школьных падручнікаў не задавальняе мноства людзей, і падручнікі будуць перапісаны. Што ж датычыць пачатку школьных заняткаў раніцай, то можа ўзнікнуць праблема, калі рабочы дзень у бацькоў малодшых школьнікаў пачынаецца значна раней, чым прапанаваны час пачатку урокаў у 9 гадзін. Праўда, фізіялагічна, так бы мовіць, аптымальны час для пачатку заняткаў менавіта у 9 гадзін.   У сустрэчы па месцы жыхарства прынялі удзел начальнік упраўлення адукацыі аблвыканкама Аляксандр Сонгін, намеснік старшыні Дзятлаўскага райвыканкама Ігар Кухарэвіч, начальнік аддзела адукацыі, спорту і турызму райвыканкама Наталля Белаус, начальнік аддзела арганізацыйна-кадравай работы райвыканкама Сяргей Багдановіч, намеснік начальніка аддзела адукацыі, спорту і турызму райвыканкама Дзмітрый Ёда.

Затым Віктар Лісковіч і Аляксандр Сонгін азнаёміліся з работай сацыяльных аб’ектаў гарпасёлка Наваельня.На сустрэчы ў выканкаме сельсавета прагучала занепакоенасць жыхароў Наваельні чуткамі, што мясцовы Дом быту можа быць закрыты. Віктар Андрэевіч Лісковіч наведаў Дом быту, азнаёміўся з яго работаю і выказаўся за працяг работы ўстановы бытавога абслугоўвання. Наступным адрасам візіту намесніка старшыні аблвыканкама стаў вакзал чыгуначнай станцыі «Наваельня». Наваельнянцы на сустрэчы ў сельсавеце прапанавалі арганізаваць у будынку, акрамя чыгуначнага вакзала, яшчэ і аўтастанцыю. Памяшканне вакзала прасторнае, загружана пасажырамі чыгункі нязначна, а рэйсавых аўтобусаў тым часам у Наваельні даводзіцца чакаць на холадзе (у асенне-зімовы перыяд). Віктар Андрэевіч даў заданне адпаведным службовым асобам вывучыць гэта пытанне. У Наваельнянскай сярэдняй школе намеснік старшыні аблвыканкама В. Лісковіч і начальнік упраўлення адукацыі аблвыканкама А. Сонгін цікавіліся арганізацыяй летняга адпачынку дзяцей. Гаспадары пазнаёмілі гасцей з уласным вопытам педагагічнай работы, публікацыя пра які змешчана ў рэспубліканскім галіновым часопісе. У калідоры напаткалі дзіцячую экскурсію з Валеўкі (Навагрудскі раён), якая наведала знакаміты школьны музей «Дзеці ліхалецця». Гаспадары запрасілі і В. Лісковіча з А. Сонгіным у музей. Зайшлі на хвілінку, а засталіся на добрыя паўгадзіны. З «музейнай» размовы ўзнікла ідэя сістэматызацыі школьных музеяў Гродзенскай вобласці і маршрутызацыі іх для наведвання турыстамі. У другой палове дня намеснік старшыні аблвыканкама Віктар Лісковіч цікавіўся арганізацыяй летняга адпачынку ў Казлоўшчынскай сярэдняй школе і падрыхтоўкаю школы да новага навучальнага года. У Казлоўшчыне праходзіць капітальны рамонт з элементамі мадэрнізацыі будынку былога ліцэя пад патрэбы сярэдняй школы. Віктар Лісковіч азнаёміўся з ходам работ. З удзелам старшыні Дзятлаўскага райвыканкама Аляксандра Дубовіка адбылося пасяджэнне будаўнічага штаба з абмеркаваннем праблемных пытанняў на аб’екце.