“Праменьчык” пабыў у “Эдэмскім садзе”

Аддзяленне дзённага знаходжання для інвалідаў “Праменьчык” Цэнтра сацыяльнага абслугоўвання насельніцтва Дзятлаўскага раёна цесна супрацоўнічае з царквой. На гэты раз благачынны цэркваў Дзятлаўскай акругі іерэй Іаан Кісель арганізаваў для асаблівых людзей доўгачаканую паездку ў Свята-Успенскі Жыровіцкі манастыр.

Там айцец Іаан адслужыў малебен аб здароўі перад цудатворнай іконай Божай Маці за ўсіх наведвальнікаў “Праменьчыка”. Удзельнікі паломніцтва змаглі прыкласціся да святыняў, падаць запіскі за родных і блізкіх, наведаць іконныя крамы манастыра, папрасіць у Жыровіцкай Заступніцы здароўя і дабрабыту.

Прыемным сюрпрызам для асаблівых людзей стала экскурсія ў “Эдэмскі сад”, дзе яны змаглі далучыцца да прыроды, пабачыць насельнікаў заасада Жыровіцкага манастыра. Усім спадабаліся мядзведзь, казулі, коні, страусы, козы, іншыя жывёлы.

Паездка падарыла наведвальнікам “Праменьчыка” станоўчыя ўражанні і душэўную радасць.

Яе ўдзельнікі і спецыялісты аддзялення выказваюць падзяку айцу Іаану Кісялю за ўвагу і пастаянную духоўную падтрымку.

Алена КАЛЮЦІК,

загадчыца аддзялення “Праменьчык” ЦСАН Дзятлаўскага раёна