Пра выхаванне дзяцей, прафілактыку ВІЧ і папярэджанне пажараў

Аб адказнасці бацькоў за выхаванне дзяцей, забеспячэнне іх бяспекі, абстаноўка з пажарамі, гібеллю на іх людзей і мерах, якія прымаюцца па яе стабілізацыі, вялася размова ў час правядзення Адзінага дня інфармавання насельніцтва, што прайшоў 15 лістапада на Дзятлаўшчыне.

Раённая інфармацыйна-прапагандысцкая група старшыні райвыканкама Аляксандра Дубовіка сустрэлася з працоўным калектывам ААТ “Дзятлаўскі сыраробны завод”. Узначаліла мерапрыемства і пазнаёміла прысутных з ходам сустрэчы начальнік аддзела ідэалагічнай работы, культуры і па справах моладзі Наталля Калодка.

Пытанне аб адказнасці бацькоў за выхаванне дзяцей, забеспячэнне іх бяспекі ўзняла начальнік аддзела адукацыі Наталля Белаус:

– Нягледзячы на тое, што ў раёне паслядоўна рэалізуюцца асноўныя прыярытэтныя напрамкі сацыяльнай палітыкі дзяржавы ў сферы абароны сям’і, мацярынства і дзяцінства, выяўляюцца факты пагарды інтарэсамі і патрэбамі дзіцяці, адсутнасці належнага догляду, жорсткага абыходжання і гвалту ў сям’і. Высокую пагрозу жыццю і здароўю дзяцей ствараюць здарэнні, звязаныя з свавольствам дзяцей з агнём. Зафіксаваны неадзінкавыя выпадкі здарэнняў. Прычынамі такіх сітуацый з’яўляюцца несфарміраваныя ў дзяцей веды бяспечых паводзінаў, адсутнасць кантролю з боку дарослых, а таксама незанятасць непаўналетніх.

Праца па рэалізацыі патрабаванняў Дэкрэта Прэзідэнта Рэспублікі Беларусь №18, якая праводзіцца ў Дзятлаўскім раёне, накіравана на забеспячэнне бяспекі дзяцей, павышэнне адказнасці бацькоў за іх выхаванне, абарону правоў і інтарэсаў непаўналетніх, якія пражываюць у сацыяльна небяспечных умовах.

 

У ходзе мерапрыемства членам інфармацыйнай групы ад прысутных паступіла некалькі пытанняў аб занятасці дзяцей у вольны час. Наталля Сяргееўна патлумачыла, што ў дзятлаўскіх установах адукацыі ў час канікулаў працуюць каля 35 летнікаў рознага накірунку, што дазваляе бацькам пакінуць дзяцей пад наглядам спецыялістаў, у пасляўрочны час працуюць групы падоўжанага дня – з дзецьмі працуюць педагогі, кіраўнікі гурткоў, спецыялісты спартыўных секцый.

На парадак Адзінага дня інфармавання было вынесена таксама пытанне прафілактыкі ВІЧ.

Работнікі РАНС расказалі аб папярэджанні пажараў і іншых надзвычайных сітуацый, агучылі статыстыку па гібелі людзей на пажарах у вобласці і ў нашым раёне. Сярод прычын пажараў па-ранейшаму “лідзіруе” неасцярожнае абыходжанне з агнём. На другім месцы – парушэнне правілаў эксплуатацыі печаў і цеплагенерыруючых прылад. Пераважна ў агні гінуць грамадзяне сталага ўзросту. У час сустрэчы з работнікамі вытворчага прадпрыемства прагучалі просьбы паклапаціцца аб пажылых бацьках і сваяках, запрасіць спецыялістаў, каб своечасова адрамантаваць печ або замяніць электраправодку, усталяваць аўтаномны пажарны апавяшчальнік.

Напрыканцы сустрэчы Наталля Калодка павіншавала работнікаў сырзавода з надыходзячым прафесійным святам, пажадала далейшага росквіту прадпрыемству, стабільнай вытворчасці і падзякавала за адказную прафесійную працу.

 

Аксана АНДАЛЮКЕВІЧ